49

olmadığı takdirde bedel-i icar mikdarı sahihinin ehl-i vukuf marifetiyle takdir ve tahmini
emr olunabilecektir.

On birinci madde
Bir dükkanda bizzat mal sahibi ikamet ettiği takdirde ol
dükkan kiraya verilmiş olsa fi-nefsi melhuz olan bedel-i icarın mikdarı esas
ittihaz olunarak ol mikdar üzerine resm-i tahsis olunacaktır.

On ikinci madde
Bedel-i icar nahiye meclisi veyahut hane ve dükkanın bulunduğu mahalle
muhtarlarından iki neferi marifetiyle takdir olunacaktır.

On üçüncü madde
Bedel-i icarların evvelce takdirinden sonra nahiye müdürü tarafından
bir cedvel-i mahsus tanzim olunacak ve bu cedvelde dahi evvelâ ebniyenin nev‘i ve cinsi
saniyen kâin olduğu mahallin ismi salisen sahib-i mülkün isim ve şöhreti rabian senevî
tahsis olunan bedel-i icarın mikdarı tasrih edilerek cedvel-i mezbur mündericatına
herkesçe malûmat hasıl olmak üzere müdir-i mumaileyh tarafından mahall-i münasibe talik
ettirilecektir.

On dördüncü madde
Cedvel-i mezkûrun talik olunduğu günden itibaren otuz
gün zarfında ebniye icarlarının takdirine veyahut diğer birisinin cedvele derc olunmadığına
veyahut bu ebniyenin takdir olunan icarlarının yerinde olmadığına dair nahiye meclisine itiraz
etmeğe ashab-ı emlakın hak ve salahiyetleri vardır.

On beşinci madde
Otuz gün müddet mürur ettikten sonra hakkında itiraz vuku bulmayan
ebniye içün cedvel-i mezbur mündericatı suret-i kat‘iyede add olunarak ebniye-i saireye
gelince bunlar içün ihtilaf hasıl olduğu takdirde nahiye meclisi ile ebniye ashabı
tarafından muhakkemler bi't-tayin işbu muhakkemlerin beyan edecekleri re'y ve mütalaaları dahi kat‘i
olacaktır.

On altıncı madde
Suret-i meşruhaya tevfikan tertip ve tanzim edilecek cedvel-i
mezkûr esas üzerine istifa olunacak rüsumatın usul ve kavaid-i mer'iyeye tatbikan
nahiye tahsildarı tarafından tahsiline teşebbüs edilecek ve fakat işbu rüsumat
tahsilatı içün tahsildara hiç bir ücret verilmeyecektir.

On yedinci madde
Minval-i muharrer üzere tertip olunacak cedvel beher sene tashihat-ı
muktaziye icrasıyla tecdid olunacaktır.

7