74

Yirmi birinci madde: Bin beş yüz nüfusu tecavüz eden her bir nahiyenin veya fırkanın zükûr ve inâsa mahsus olmak üzere başka başka birer mekteb-i ibtidaiyesi bulundurulacaktır.

Yirmi ikinci madde: İnâsa mahsus mekatib-i ibtidaiye muallimeler ve zükûra mahsus muallimler marifetiyle idare olunur ise de sancak mekatib meclisi kararıyla zükûra mahsus mekatib-i ibtidaiyede muallime ve inâsa mahsus mekatib-i ibtidaiyede muallim istihdamı dahi caiz olabilir.

Yirmi üçüncü madde: Mekatib-i ibtidaiyede müddet-i tedrisiye ekall on ay imtidad eder. Fakat her bir kazanın levazım-ı mahalliyesine ve ahalisinin başlıca meşagiline riayeten sene-i tedrisiyenin bidayet ve nihayeti liva mekatib-i ibtidaiyesi tarafından tayin ve tahdid olunur.

Yirmi dördüncü madde: Mekatib-i ibtidaiyede okuyacak atfal sene-i tedrisiyenin ibtidasında ve nihayet bir mah müruruna değin mektebe kabul ve idhal olunur. Fakat hasta olduğunu veyahut velilerinin nakl-i mekan ettiklerini ispat edenler bu kaideden müstesna tutulur.

Yirmi beşinci madde: Mekatib-i ibtidaiyede biri sene-i tedrisiyenin nısfında ve diğeri hitamında olarak iki defa imtihan-ı aleni icra olunur.

Yirmi altıncı madde: Mekatibde mücazat-ı cismaniye memnudur.

Yirmi yedinci madde: Mekatib-i ibtidaiyenin dahili idare ve intizamının tafsilatına ve şakirdanın üslup ve harekatına mütedair lazım gelen kavaid nizamname-i mahsus ile tayin olunacaktır.

Yirmi sekizinci madde: Mebadi-i tedrisin tamimi zımnında üç yaşından yedi yaşına kadar olan sıbyana mahsus olmak üzere sıbyan mektepleri ve yaşlı olanlara mahsus olmak üzere dahi gece ve eyyam-ı tatiliye mektepleri dahi küşad olunabilir. Bu makule mekatibin tesis ve tanzimi nizamname-i mahsus ile tayin olunacaktır.

Üçüncü Fasıl

(Mekatib-i umumiye muallimleri hakkında)

Yirmi dokuzuncu madde: Mekatib-i ibtidaiye-i umumiyeye muallim olmak isteyenlerin şerait-i atiyeyi cami olmaları farzdır:
(1) Yerliden olması
(2) On sekiz yaşını mütecaviz bulunması

(Hukuk)