94

Yüz kırkıncı madde: Sancak mekteb meclisi a’zâsı dâhil-i dâire-i livâsında bulunan bi’l-cümle umûmî ve husûsî mektebleri ziyâret ve teftîş edebilecekdir.

(2) Vilâyet Mekâtib Meclisi

Yüz kırk birinci madde: Maârif müdîriyeti maiyyetinde bir vilâyet mekâtib meclisi vardır. Bunun hey’eti zevât-ı âtiyeden:
(1) Reîs maârif müdîrinden,
(2) Kâtibi maârif müdîriyeti tahrîrât mümeyyizinden,
(3) Meclis-i umûmî-i vilâyet tarafından müntehab meclis-i mezkûrun iki a’zâsından,
(4) Rüesâ-yı rûhâniyeden,
(5) Her bir sancakda mevcûd mekâtib müfettişlerinden bir kişi me’hûz olarak altı mekâtib müfettişlerinden,
(6) Gerek ibtidâiye ve rüşdiye mektebleri muallimlerinden ve gerek ulemâ-yı meşhûreden me’hûz olarak maârif müdîriyeti kararnâmesiyle ta’yîn olunacak sekiz a’zâdan ibâretdir.

Vilâyet mekteb meclisi a’zâsı bir sene müddetle intihâb ve ta’yîn olunur.

Yüz kırk ikinci madde: Vilâyet mekâtib meclisi lâ-akal senede dört def’a ve lüzûmuna göre maârif müdîri her ne vakit da’vet eder ise ictimâ’ eder.

Yüz kırk üçüncü madde: İşbu meclis a’zâsı meccânen hizmet ederler ancak ictimâ’a merkez-i vilâyet hâricinden da’vet olunan a’zâların yevmiyeleriyle harcırahları te’diye olunur.

Yüz kırk dördüncü madde: Vilâyet mekteb meclisinin vezâifi
(1) Mekâtib-i ibtidâiyeye mütedâir bi’l-cümle intizâm ve usûl-i tedrîsiye ve ta’lîmiyeye müteallik mesâili tezekkür etmek.
(2) Maârif kavânîn ve nizâmnâmeleri lâyihalarıyla mekteblerde isti’mâl olunacak usûl-i tedrîsiye ve resâil ve mevâdd-ı ilmiye planları üzerine re’y vermek.
(3) Umûr-ı maârifin terakkîsine medâr olacak tedâbîri arz etmek ve maârif müdîrinin kendisine havâle etdiği bi’l-cümle mesâil ile mebâdî-i tedrîs ahvâline dâir sancak mekâtib meclisleri tarafından gönderilen raporları tezekkür etmek.

( Mebâdî )