131

Kırk dokuzuncu madde işbu nizamnamede zikr ve beyan kılınan cerayim üzerine lâhik
olacak hükümlerde nahiye ve zabıta müdürlerinin ve polis ve jandarma zabitanının
ve orman memurlarının ve ashab-ı emlak ve arazi korucularının takdir ve şehadetleri
aksi isbat olunmadıkça mamul ve muteber tutulur.

Ellinci madde cerayim-i saydiyeden biriyle mahkûm olanlar ba'de'l-hükm bir sene geçmeksizin
tekrar mahkûm olurlar ise sabıkalı add edilir ve o halde mücazat iki kat
olarak icra olunur.

Elli birinci madde sayd ve şikâra müteallik kâffe-i deavi cürmün tarih-i vukuundan
itibaren üç mah mürurundan sonra mesmu olmaz.

Elli ikinci madde Adliye ve Maliye Nezaretleri işbu nizamnamenin icrasına memurdur.
İrade-i seniye tarihi fi 18 Safer sene 99

***

Ebniye-i Emiriye ve Vakfiye İnşaat ve Tamiratı hakkında olan Nizamnamenin
On altıncı maddesi makamına kaim olmak üzere tadilen kaleme
alınan madde-i nizamiyedir.

On altıncı madde deruhde olunan ebniyenin masarif-i mukannenesinden yüzde yirmi
beşinden ziyadesinin peşinen itası caiz olmayacak ve ebniye yapıldıkça verilecek mebaliğ
tamamen tediye olunmayıp gayr ez peşin yüzde onu ebniyece zuhur edebilecek noksanın
tazmini için tevkif olunarak teraküm edecek mikdar akçe keşf-i sanisinin icrasıyla
ba'de't-tasdik ita olunacağı gibi emaneten inşa veyahut tamir olunan mahaller masarifi
dahi def'aten memuru yedine verilmeyip mubayaat meclisince icra ile alındıkça parası
ifa ve amele yevmiyesi ve sair masarif-i müteferrikası dahi taht-ı nezaretde olarak memuru
marifetiyle tesviye ve ifa ettirilecektir muamelat-ı mesrudenin hüsn-i cereyanına heyet-i
meclis ihtimam ve dikkat edecektir.

Fi 11 Rebiülevvel sene 299 ve fi 19 Kânun-ı Sani sene 297