151

Her iki suretde mecalis-i mezkûre kendilerini davet eden heyet tarafından tayin olunacak suver ve usule tevfikan içtima edecek ve kararları dahi sebeb-i tecemmüleri olan maddeye münhasır kalacakdır.

İngiltere ve Fransa'da bulunan tahvilat-ı Osmaniye'nin aded ve kesretine nazaran meclisin riyaset-i seneviyesi beş sene müddet zarfında ve meclisin ilk intihabile tayin olunacak tertib üzere bil-münavebe İngiliz ve Fransız vekillerine ihale edilecekdir.

Şayet bu hal ilk beş sene mürurundan sonra esasen tebdil edecek olur ise meclis reisini kendisi intihab edecekdir.

Reisin gaybubeti veya muvakkat mani ve mazereti vukuunda bu gaybubet ve mazeretin devamı müddetince emr-i riyaset meclisin en kıdemli azası tarafından icra olunacakdır.

Azay-ı meclisden her biri re'yi haiz olacakdır.

Kararlar ekseriyet-i ara ile ita olunacak ve tesavî-i ara zuhurunda reisin re'yi müreccah tutulacakdır.

Meclisin ilk içtimaı azasının tayinini mütaakib vukua gelecekdir.

İşbu nizamnamenin neşr ve ilanından iki ay sonra meclisin icray-ı memuriyete mübaşeret ve mesalihi temşiyet edebilmesiçün alel-usul intihab ve tayin olunmuş üç azanın hazır bulunması kâfi olacakdır.

Meclis mükemmel bulunacağı vakit umur ve mesalihinin muntazaman temşiyeti içün la-akal üç azanın huzuru iktiza edecekdir.

Azay-ı meclisden bazısının infisalinde veya esbab-ı saireye mebni azalığın munhal kalacağı müddet zarfında meclis iktidar ve salahiyet-i asliyesine tevfikan her bir kararı ittihaz etmek hakkını muhafaza edecekdir.

Meclisin memuriyeti ancak işbu nizamnamenin şamil olduğu istikrazatın tamamen imhasında hitam bulacakdır.

On Birinci Madde — Meclis-i İdare sekizinci maddenin beşinci ve altıncı fıkralarında beyan olunan ahvalde duhan varidat-ı aşriyesi dahi dahil olmak üzere madde-i mezkûrede «evvelâ» «sâniyen» «hâmisen» «sâdisen» «sâbian» «tâsian» işaretli fıkralarda tadad olunan varidat ve sair hasılatı kendi memurları vasıtasile...