156

On dokuzuncu madde: İşbu nizamname ahkamının suret-i tefsir ve icrasına müteallik Hükümet-i Seniye ile Meclis beyninde zuhur edecek her nevi ihtilaf tarafeynden mansub dört hakemin kararına havale olunacak ve bunlar dahi indeli’l-icab tesavi-i arayı def içün diger bir hakem intihab edeceklerdir. Hakem kararı kat’i ve gayr-i kabil-i istinaf olacakdır.

Yirminci madde: Hükümet-i Seniye mukavele-i hazıreyi fesih veyahut tatil edecek olur ise hamiller yedlerindeki senedat işbu nizamname ahkamına tevfikan imha edilmiş bulunmadıkça istikraz mukavelat-ı asliyesiyle tayin olunmuş olan hukuklarını tekrar kâmilen ihraz edeceklerdir. İstikraz mukavelat-ı asliyesiyle hamillere verilen teminat bu teminatın ba-mukavele aid oldukları istikrazatın işbu nizamname ahkamına tevfikan büsbütün imhasına değin hukuk-ı mezkûrenin muhafazası içün muhassas kalacakdır.

Yirmi birinci madde: Hükümet-i Seniye fi 1 ve 13 Kanun-ı Sani sene 1882 tarihinde ifa-yı vazifeye mübaşeret edecek olan Varidat-ı Muhassasa İdaresine müteallik ciheti müstesna olmak üzere ilanı tarihinden itibaren mer’iyyü’l-icra olacak olan işbu nizamnameyi bila-tehir Dersaadet’de mukim düvel-i ecnebiye süferasına tebliğ edecekdir.

Meclis-i İdare azası bin sekiz yüz seksen iki senesi Kanun-ı Sani-i Rumisi’nin birinci günü Dersaadet’de toplanacakları halde Rüsum-ı Sitte İdare-i Hazıresi Varidat-ı Muhassasa İdaresinin suret-i cereyanına fasıla vermemek içün tarih-i mezkûrdan sonra ve Meclis-i İdare ifa-yı umura hazır oluncaya değin rüsum-ı mezkûreyi Meclis namına idare etmekde devam eyleyecekdir.