7

Ebniye Kanunu

* Üçüncü Fasıl *

( Muhterik Mahaller )

Yirminci Madde — Gerek etrafı yol ile mahdud adalar ve gerek mahallât büsbütün
veyahut on haneden ziyadesi muhterik oldukda o mahal yeniden taksim ile tarla vechile
tesviye olunacaktır. Şöyle ki o mahallin heyet-i kadîmesi yani harîkden mukaddem mevcûd
olan yollar ile her arsanın mesaha-i sathiyesi gösterilerek bir harita-i umumiyesi
tersîm olunup sekizinci madde ahkâmına tevfîkan etraf ve derûn sokaklarının tevsî‘
ve istikameti kırmızı hat ile çizildikten sonra terettüb eden zayiat-ı umumiyeden
yüzde hesabiyle her arsanın mikdar-ı kadîmi nisbetinde isabet edecek zayiat
bi’l-ihrâc arsalar mümkün mertebe murabba veya müstatil olmak ve şeref ve kıymet-i kadîmesi
gözetilmek ve yüzleri tûlünün mikdar-ı cedîdi kadîm yüzleri mikdarına nisbet ve hisâb
edilerek verilmek üzere taksimatı icra ve ber-mûceb-i harita arsa sahiblerine
bâlâsı haritalı birer ilmühaber itâ olunacaktır.

Yirmi Birinci Madde — Yirminci maddede muharrer adalarda bulunan çıkmaz sokaklar mahallin
iktizasına ve tahammülüne göre ya küşâd veyahut sedd olunarak adasına taksim
edilecektir.

Yirmi İkinci Madde — Yirminci maddede muharrer haritanın suret-i tensîb
ve icrâsı on ikinci madde ahkâmına tatbik olunacak ve bu misillü mahallerin tesviyesinde
tevsî-i tarîk içün terki lâzım gelen yerlerin mesaha-i sathiyesinin nihayet rub‘unu
tecavüz etmemek şartiyle ashabı tarafından meccanen terk olunacak ve harîk mahalleri
dâhilinde ve ittisâlinde bulunan bostan ve bağ ve bahçe ve arsalar muhterik hükmünde işbu
taksime idhâl edilecektir.

Yirmi Üçüncü Madde — Ada tesviyesinden dolayı arsaların tebdîl-i mahalli iktiza
ettikde her arsa sahibi arsasındaki enkazını yeni arsasına nakl
edebilecektir.