18

Dahiliye

On Birinci Fasıl

( Münhasıran İstanbul ve Bilâd-ı Selâse Ebniyesi )

Yetmiş dokuzuncu madde — Cesîm harîk vukûuyla nizâmına tevfîkan tesviye edilerek tarla hey'etine konulmuş ve sûret-i muntazamada sokakları açılmış ve hatt-ı istikâmeti ta'yîn edilip bir daha tevsî' ve tesviyesine mahal kalmamış olan ve yâ tarafeyni kârgîr bulunan yerlerde müceddeden inşâ olunacak ebniye kârgîr olacakdır.

Sekseninci madde — Yetmiş dokuzuncu madde mûcibince kârgîr olması meşrût olan yerlerden ba'zı kıymetsiz ve kenâr mahallerin sûret-i muntazamada sokakları açılmış ve hatt-ı istikâmeti ta'yîn olmuş olsa bile ashâbının fakr u zarûreti cihetiyle kârgîr inşââtına mütehammil olmadığı Şehreâmanetince ve Şûrâ-yı Devletçe inde't-tahkîk tebeyyün eylediği hâlde o misillü mahallerdeki binâlar bi'l-isti'zân şeref-sâdır olacak irâde-i seniyye ahkâmına tevfîkan bi'l-istisnâ meşrûtan ahşâb yapılması câiz olacakdır.

Seksen birinci madde — Boğaziçi'nin sâhil ebniyesiyle bağ köşklerinin bilâ-kayd ü şart ahşâb olarak inşâsı câizdir.

Seksen ikinci madde — Yetmiş dokuzuncu madde mûcibince kârgîr olması meşrût olan mahallerden mâadâ yerlerde yapılacak binâların seksen üçüncü maddede gösterilen şerâita tevfîkan ahşâb olması mecâzdır.

Seksen üçüncü madde — Seksen ikinci madde mûcibince ahşâb olarak inşâsı tecvîz olunan binâların dışarısı kaplama ve yâ sıva olarak inşâda sâhibi muhtâr olup fakat dîger binâ ile ittisâl eden her binânın sâhibi tarafından hîn-i inşâsında binânın sağ cihetde îcâbı vechile taş ve yâ tuğla ile sakfden iki zirâ' mürtefi' bir dîvâr yapılması mecbûrîdir. Hâm arâzîde olup mahalle şekline konulacak mahallere inşâ olunacak her nev' ebniyenin birbirine lâ-akal sekiz arşın uzak olduğu hâlde ahşâb olarak yapılması câizdir. Bu makûle ebniye yekdiğerine sekiz arşından
( noksan )