( 29 )

Posta Nizamnamesi

İkinci Fasıl

( Evrak-ı Mühimme )

Dokuzuncu Madde — Umur-ı devlete dair muharrerat-ı resmiye içün hiç bir yerde ücret alınmayacaktır.

Onuncu Madde — Memurîn-i hükümet tarafından evrak-ı resmiye arasına umur-ı zatiyeye müteallik muharrerat ve saire konulmak memnudur. Konulacak olur ise kaçak mektub hakkında olan muamele icra edilecektir.

On Birinci Madde — Umur-ı devlete müteallik muharrerat-ı resmiyenin diğerlerinden fark ve temyizi içün Dersaadetçe dairelerden ve kapı kethüdalıkları caniblerinden gönderilen kâffe-i muharrerat zarfları üstünün sağ köşesine o dairenin ve kapı kethüdalıklarının ve taşralarca vilayet ve sancak ve kaza ve asker meclislerinin mührü basılacaktır.

On İkinci Madde — Memuriyet-i fevkalâde-i mülkiyesi olanlar canibinden ve askerî meclisi olmayan yerlerde ümera ve zabitan-ı askeriye taraflarından postaya verilecek muharrerat-ı resmiyeye fevkalâde mülkiye memuru tarafından ise umur-ı mülkiye ve ümera ve zabitan-ı askeriye taraflarından ise mevad-ı askeriye lafızları tahrir ve işaret olunup bulundukları mahallin hükümet mührüyle temhir ettirilecektir.

On Üçüncü Madde — Neferden başçavuşa varınca efrad-ı asakir-i şahane tarafından posta işlemeyen mevkilerden familyalarına gönderilen ve familyalarından kendilerine gelen mekatibden ücret alınmayacak ve efrad-ı askeriye tarafından memleketlerine gönderilecek mektublar zabitleri tarafından ve familyaları canibinden anlara irsal kılınacak mekatib dahi hükümat-ı mahalliye tarafından bir alamet-i mahsusa ile taht-ı tasdike alınacak ve mektublar mahal be-mahal bi't-tefrik bir zarf derununa vaz' ile paket edilerek ve üzeri nereye olduğu yazılarak postahaneye verilecektir.

On Dördüncü Madde — Bir memurdan diğer memura gidecek evrakın torba ve paketleri ip ile bağlanıp bir kaç yerinden mühür mumuyla mühürlendikten başka mektublar gibi...