(30)

Dahiliye

Mühr-i resmî ile dahi temhîr olunacaktır. Ve umûr-ı devlete müteallik muharrerât posta sandıklarına atılmayıp lâzım gelen jurnaliyle beraber bizzat posta memurlarının yedlerine teslim olunmak lâzımdır.

* Üçüncü Fasıl *

( Muharrerât-ı Şahsiyye )

On beşinci madde: Postalarla nakl olunacak mektuplar için her postahanede bir sandık bulunup ashâbı tarafından getirilecek mekâtib on altıncı maddede gösterilen kaide mucibince üzerlerine pul yapışmak şartıyla o sandığa atılır.

On altıncı madde: Postalarla berren nakl olunacak mektuplardan sıkleti on gramı tecavüz etmeyenlerden ikişer kuruş ve bahren iskele arasında veyahut demiryolu mevkilerinde ve araba işleyen tarîklerde taati olunan mektuplardan yirmi para ücret-i mütesâviye ahz olunur. Sıkleti on gramı tecavüz eder ise beher on gram veyahut her on gramın küsuratı için ücret-i asliyenin bir misli daha zam olunur. Ve mektubun taahhüt olunması mürsil talep eyler ise bâlâda tayin olunan ücuratın iki mislini te’diye eder. Taahhütlü taahhütsüz bilcümle mekâtib ve mürâselâtın ücuratı peşinen ahz ve istifâ olunmak lâzım gelir. Ve yalnız adi mektupların ücuratı mürsilünileyh tarafından iki kat olarak alınmak üzere mürsil merkezlerden bilâ ücret yani pulsuz olarak kabul ve sevk olunabilir. Ve ücreti peşinen te’diye olunan mektuplar üzerine vaz’ olunacak pullar behemehal mürsil tarafından yapıştırılıp postahanece mürsilin gözü önünde üzeri iptal mührüyle damgalandıktan sonra madde-i sâbıkada muharrer sandığa bırakılacaktır.

On yedinci madde: Postaların vürûdunda postahanelerden mekâtibin halka kangı saatte i’tâ kılınacağını müş’ir derhal herkesin göreceği bir mahalle siyah zemin üzerine ve celî hatla yazılmış bir levha ta’lîk kılınacağı gibi postaların hareketinden evvel kangı saate kadar postahanelerce mektup ve sâire kabul edileceği ( dahi )