( 41 )

Posta Nizâmnâmesi

Altmış Beşinci Mâdde — Posta idâresinin ecnebi postalarla olan muâmelâtı Hükûmet-i Seniyye ile düvel-i ecnebiye beyninde mün‘akid posta muâhedesine tâbi‘dir.

Altmış Altıncı Mâdde — İşbu nizâmnâmenin târîh-i neşrinden i‘tibâren fî 26 Rebîülâhir sene 288 târîhli posta nizâmnâmesi münfesihdir.

Altmış Yedinci Mâdde — Dâhiliye Nezâreti işbu nizâmnâmenin icrâsına me’mûrdur.
İrâde-i Seniyye târîhi: fî 2 Şa‘bân sene 299 ve fî 7 Hazîrân sene 298.

***

Postalarla naklolunacak meskûkât, emânâtı ile gazete ve nümûne ve eşyâ-yı sâire ücûrâtının ta‘rifesidir.

( Emânât-ı Nakdiye Ücûrâtı Ta‘rifesi )

Birinci Mâdde — Sevâhil postahânelerinden yekdiğerine altun [altın] olarak gönderilecek emânât-ı nakdiyenin bu‘d-i mesâfesi hisâb olunmayarak ale’s-seviye bir guruşdan bin guruşa kadar yüz pâre ücret alınacağı gibi bir vilâyet dâhilinde bulunan bir postahâneden diğer postahâneye ve timur yolu [demiryolu] ve araba yolu üzerlerinde bulunan postahâneler içün bir başından o bir başa kadar kezâlik beher bin guruşdan yüzer pâre ücret alınacaktır.

İkinci Mâdde — Altun olarak gönderilecek emânât-ı nakdiyenin mikdârı bin guruşu tecâvüz eyledikçe beher bin guruşdan küsûrâtı dâhil olmak şartıyla ücret-i asliye misillü yüzer pâre ücret alınır.

Üçüncü Mâdde — Gümüş emânetler içün her bir vilâyetin dâhilinde ve sevâhilin yekdiğeri arasında ve timur yolları ve araba yolları üzerinde bulunan mevâkıf beyninde bir guruşdan iki yüz elli guruşa kadar iki ve iki yüz elliden beş yüz guruşa...