61

İntihab-ı Me’murin Komisyonu Talimatı

muadil bir kaymakamlık açıldıkda evvel be-evvel kendisine teklif ettirilecektir. Üçüncü sınıf kaymakamlardan müdürlüğü ve nahiye müdürlerinden zabıta müdürlüğünü kabul edecek olanlar hakkında dahi bu yolda muamele olunacaktır.

Yirmi dördüncü madde: Bir mahalden infisal ile diğer bir me’muriyet istihsaliçün komisyona müracaat edenlerin liva meclis-i idaresinden musaddak tebrie-i zimmet mazbataları ve yedlerinde bulunacak sair evrak evvel emirde kalemce tetkik ve kaydiyle tatbik olunarak netice-i hasıla ile esbab-ı infisalleri arzuhalleri zahrına tahrir ile kalem müdürlüğü canibinden ba’de’t-temhir komisyona verilecek ve bu tetkikat hükmünce bir gûna ilişiği olmayanların müntehab takımından ise defter-i mülazimine ve müntehabinden değil ise imtihanı icra olunmak üzere defter-i mahsusuna kaydı muamelesi komisyon karariyle kalemce icra kılınır.

Yirmi beşinci madde: Tetkikatta ilişiği zuhur edenler mahalliyle ve devair-i lazıme ile ba’de’l-muhabere ilişikleri kat’ edilmedikçe mülazemet ve imtihan defterlerine kayd olunmayacaktır.

Yirmi altıncı madde: Biri komisyona havale olunan evrakın ve biri kazaların ve me’murları bulunan kaymakamların isim ve sınıflariyle miktar-ı maaşlarının ve biri nevahi-i mevcude ile müdürlerinin ve zabıta müdürlerinin isim ve maaşlarının ve biri kaymakam ve nahiye ve zabıta müdürlerinin teracim-i ahvalinin ve biri imtihana gireceklerin esamisinin ve biri ba’de’l-imtihan intihabname alarak veyahut zâten müntehabinden olduğu halde infisal ile me’murin mülazemetinde bulunanlar esamisinin kaydlerine mahsus olmak üzere kalemde altı kıt’a defter tutulacaktır.

İrade-i seniye tarihi fi 30 Ramazan sene 299 ve fi 2 Ağustos sene 298