72

Dahiliye
Beş sene mukaddem memuriyetinden infisal edip de o vakitten beri mazul bulunanlara ve kezalik tarih-i mezkûrdan beş sene mukaddem vefat edenlerin eytam ve eramiline sandıktan maaş tahsis olunmaz.

İkinci Fasıl

( Mütekaidin müteallikatına verilecek maaşların derecatı )

Otuz dördüncü madde — Hizmet mukabili tekaüd için meşrut olan müddeti ikmal edip de kabl-et-tekaüd veyahut ba‘d-et-tekaüd vefat edenlerle otuz sekizinci madde mucibince müddet-i hizmeti tam on beş seneye baliğ olduğu halde fevt olanların ve otuzuncu maddede gösterilen ahvalden naşi tekaüd maaşına nail olduktan sonra veya nail olmadan irtihal edenlerin bir yetimine müteveffanın müstahak olduğu maaşın nısfı ita olunur ve eytamın taaddüdü halinde işbu nısf maaş beynlerinde mütesaviyen taksim kılınır ve bunlardan vefat edenler ile zükûrdan olup da yirmi yaşını ikmal eyleyenlerin ve inasdan tezevvüc edenlerin taksim-i mezkûrdan isabet eden hisseleri kat‘ olunarak diğer yetim ve yetimelerin maaşlarına zam olunur.

Otuz beşinci madde — Otuz dördüncü madde mucibince eytamı müstahak-ı maaş olanların zevce ve valide ve ceddeleri dahi birer yetim hükmündedir ancak valide ve ceddenin eytamdan ma‘dud bulunmaları bîkes olmakla meşrutdur zevcenin taaddüdü halinde bir zevcenin hissesi zevcat beyninde mütesaviyen taksim olunacağı gibi valide ile cedde dahi bulunur ise validenin hissesi cedde ile beynlerinde seviyyen taksim edilir ve müteveffanın eytamı olmayıp da yalnız zevcesi veya valide veyahut ceddesi bulunur ise zikr olunan nısf maaş bunlara tahsis olunur ve müteaddide zevcelerden vefat edenlerin taksim-i mezkûrdan kendilerine isabet eden hissesi kat‘ ile henüz hayatta olan zevcenin maaşına zam olunur vefat eden valide ve cedde hakkında dahi o vechile muamele edilir mutallaka maaştan mahrum olduğu gibi müteveffanın sair akaribi dahi maaşa nail olamaz.

( Otuz altıncı )