118

Maliye

Hafiyyen kaçırılır iken tutulan balık ve saire kâmilen müsadere olunarak Dersaadet Balıkhanesinde ve mülhakat idarelerde bil-muzayede satılıp esman-ı hasılasının nısfı bâ-sened tutan ve haber verenlere verilir ve nısf-ı diğeri esbab-ı mucibesinin tasrihiyle idarenin hasılat-ı icmaline kayd-ı irad olunur.

On İkinci Madde: Merkez ve mülhakat memurlarının kâffesi denizde kayık ve karada dükkân peyda ederek veyahut esnaf ile şirket akd eyleyerek balıkçılık kâr ve sanatı icra etmekten kat'iyyen memnu'durlar.

On Üçüncü Madde: Dersaadet balıkçı esnafının ağları torbalarının gözleri zabıta-i saydiye nizamnamesinin otuzuncu maddesinde muharrer kaideye tevfikan beher dıl'ı on sekiz milimetro olmak mukarrerdir. Fakat hamsi balığının mevsim-i mevridi olan Kânun-ı Evvel ve Kânun-ı Sani ve Şubat ve Mart aylarında ağlarına korna tabir olunur ufak gözlü torba rabtına mezundurlar. Bu korna denilen torba dahi mevsim-i mezkûrdan başka vakitlerde istimal olunmak caiz değildir. Bunun hilafına hareket edenlerden sayd ettikleri balıklar idare canibinden bil-müsadere denize dökdükden başka bir yüzlük Osmanlı altınından beş Osmanlı altınına kadar ceza-yı nakdî alınır.

On Dördüncü Madde: Saydı memnu olan balıkların cinsine göre derece-i cesameti muahharan Balıkhane İdaresi tarafından tanzim ve ilan olunacak cetvel ile tayin olunacaktır.

On Beşinci Madde: Zabıta-i saydiye nizamname-i umumisinin sayd-ı bahriye ait ahkâmından işbu nizamnamede mezkûr olmayan mevad Dersaadet'te dahi cari olacaktır.

On Altıncı Madde: İşbu nizamname Dersaadet Balıkhane İdaresine dair talimat makamına kaim olacaktır.

On Yedinci Madde: Maliye Nezareti işbu nizamnamenin icrasına memurdur.

İrade-i Seniye tarihi fi 12 Cemaziyelahir sene 99 ve fi 19 Nisan sene 98

(Kefalet)