253

Nevahi Yolları Hakkından Kanun

On sekizinci madde
Ameliyat-ı mükellefe günleri nevahi mecalisi marifetiyle bedel-i nakdiye tahvil olunur.

On dokuzuncu madde
Nevahi yolları yukarıki maddelerde zikr olunan varidatdan maada hiref ve sanayi erbabı tarafından verilecek ianat misillü varidat-ı gayr-i melhuzadan dahi müstefid olurlar.

Yirminci madde
Eğer bir nahiye yoluna ormanlardan kereste kat'ı ve madenlerin hafri ile taş ihracatı nakliyatından dolayı bir gûne hasarı mucib olacak olursa mezkur orman ve maadin ve eşcar ashabı veyahut müteahhidleri tarafından zikr olunan yol içün ayrıca iane verilir.
İşbu ianenin mikdarı hasarat-ı vakıanın derecatına göre olup şayed bundan münazaa tahaddüs edecek olur ise dava idare mahkemeleri canibinden tayin-i mikdar edilir.
İşbu ianat senevi tertib ve tayin kılınup mükellefinin talebine göre ya nakden veyahut bedenen ifa olunur.

Yirmi birinci madde
Mecalis-i kebire azadan bir kaçının veya mutasarrıfın teklifat-ı vakıası üzerine en ziyade fakr halleri olan nevahi içün ianat itası hakkında re'y verirler işbu ianatın her iki sınıf yollara şümulü olabilir.

Yirmi ikinci madde
Nevahi yolları idaresi her sene mevaridat-ı kebire yollarının idaresiyle inşaatına mahsus bilcümle levazımatın cedvelini tanzim ile nahiyeye aid olan hissenin hudud ve düsturlarını tayin eder zikr olunan cedvel mecalis-i kebireye gönderilir.

Yirmi üçüncü madde
Mecalis-i kebire şehr-i Eylül esnasındaki içtimalarında mevaridat-ı kebire yollarının bütçesine re'y ve karar verecekleri sırada derece-i nüfusuna göre her bir nahiye aid olan mikdarı dahi kat'iyyen tayin ederler.

Yirmi dördüncü madde
Eğer mecalis-i mezkure tarafından icab eden varidat hakkında itayı re'y ve karar olunmaz ise mutasarrıf nevahi yolları idaresinin raportı üzerine işbu kanunda muayyen olan tekalifin hududu dairesinde olarak bizzat tayin edebilür.