76

Dokuzuncu Madde: İşbu nizamnâmenin icrası Ticaret ve Ziraat Nezaretine aittir.
İrade-i seniye tarihi
Fi 19 Cemâziyelevvel sene 97 ve fi 17 Nisan sene 96

***

Ziraat Odaları Hakkında Nizamnâmedir

Birinci Madde: İşbu nizamnâmede tayin olunan vezaif ile mükellef olmak üzere Dersaadet’te ve vilayet ve liva ve kaza merkezlerinde birer ziraat odası teşkil olunacaktır.

İkinci Madde: Ziraat odalarının azalığı umumen fahridir. Bunlar Dersaadet’te yirmi dört ve vilayet merkezlerinde on iki, sancaklarda sekiz ve kazalarda dört azadan ibaret olacaktır.

Üçüncü Madde: Aza la-akal yirmi beş yaşını mütecaviz erbab-ı ziraat ve ashab-ı iktidardan bulunmak ve müddet-i memuriyetleri dört sene olmak üzere intihab ve tayin edilecek ve nısfı iki senede bir kere tebdil kılınacaktır. Ve ilk defa çıkacak aza kur’a ile çıkarılıp andan sonraki senelerde müddet-i memuriyetini ikmal edenler ihraç olunacaktır. Çıkan azanın tekrar intihabı caizdir.

Dördüncü Madde: Vilayet ve liva ve kazalar odaları azasının emr-i intihabları ittifak veya ekseriyet-i ara ile mahalli idare meclisleri taraflarından ve bunların tasdik-i memuriyetleriyle Dersaadet’teki oda azasının intihab ve tayini Ticaret ve Ziraat Nezareti canibinden icra kılınacaktır.

Beşinci Madde: İşbu odalar azay-ı müntehabesi ittifak veya ekseriyet-i ara ile içlerinden iki sene müddetle birer reis-i evvel ve sani ile müzakerat-ı vakıayı zabt ve tahrir için birer katib-i evvel ve sani intihab ederek bunların memuriyetleri tasdik olunmak üzere isimleri vilayat taraflarından Ticaret ve Ziraat Nezaretine bildirilecektir.

Altıncı Madde: Müddet-i mahdude-i nizamiyeleri münkazıye olan reis ve katiblerin tekrar intihabı caizdir.

Yedinci Madde: Kaza odaları liva odalarına ve liva odaları merkez vilayet odalarına ve anlar dahi doğrudan doğruya Ticaret ve Ziraat Nezaretine müracaat