77

Edeceklerdir fakat işbu odaların hangisi olur ise olsun lüzum ve icabı
takdirinde doğrudan doğruya nezaretle muhabere edebilir.
Sekizinci madde: Ziraat odaları azası lâ-akal her ayın birinde ve on beşinde
iki defa içtima edecek ve lüzumu takdirinde eyyam-ı sairede dahi inikad eyleyeceklerdir.
Müzakerat-ı vakıaya ittifak veya ekseriyetle karar verilir.
Dokuzuncu madde: Ziraat odalarının vazifesi her nevi hububat ve nebatat ve meyve
ve orman ağaçlarının ve her nevi hayvanat-ı ehliyenin ıslah ve terakkisi esbabının
taharrisi ve ziraate ait mesail-i nafia ve mıdarranın mütalaa ve müzakeresiyle verilecek
kararları yedinci maddede beyan olunduğu üzere Ziraat ve Ticaret Nezaretine ba-mazbata
bildirilmekdir ve mahallerince heman icrası lazım gelen mevadı nezarete beyan etmeleriyle beraber
derhal hükümet-i mahalliyeye resmen iş'ar edeceklerdir. Gerek nezaret ve gerek mahalli
hükümetleri canibinden vazifelerine müteallik mevad hakkında vuku bulacak müracaat
üzerine dahi bilmüzakere reylerini beyan etmeğe ziraat odaları me'zundur.
Onuncu madde: Ziraat odaları beher sene şehr-i Mart içinde fevkalade olarak
mütevaliyen birkaç gün içtima edip sene-i sabıkada verilen kararları ve mahalli ziraatinin
ahval ve keyfiyatını ve muamelat-ı vakıaya dair bir senelik vukuat ve icraatı şamil
bir kıta cetvel tanzim edip ba-mazbata Ziraat ve Ticaret Nezaretine takdim eyleyeceklerdir.
On birinci madde: Ziraat odalarının işbu nizamnamede gösterilen esasa göre
tafsilat-ı vezaifi Ticaret ve Ziraat Nezareti tarafından talimat-ı mahsusa ile tayin
kılınacaktır.

İrade-i seniye tarihi fi 29 Receb sene 97

***

Dersaadet Sanayi Odası Hakkında Nizamnamedir

Birinci madde: Dersaadet'de yirmi dört azadan mürekkep bir sanayi odası teşkil
olunacaktır.
İkinci madde: Sanayi odası azası yirmi beş yaşından aşağı olmamak
ve lâ-akal iki sene sanayiyle meşgul olarak bir güne cünha ve cinayetle müttehem olmamış
ve itibarına halel gelmemiş bulunmak ve ashab-ı namus ve istikametten olmak üzere fabrika