90

Yirmi dokuzuncu madde: Bir maddenin icra-yı tahkik ve tecessüsüyle mahall-i niza ve vak’ada istima-ı şuhûd içün mahkeme azasından hariç şehre memur ve izam olunacak olanlar masarıf-ı rahiye ve sairelerine mukabil maaşlarının miktarına göre yüzde bir alacaklardır.

Otuzuncu madde: Mahkemeye celbi icab edip hariç şehirde bulunan eşhas yedlerine ihzariye varakalarını götürüp teslim etmek üzere memuren sevk ve izam olunacak mahkeme hademesine masarıf-ı rahiyeleri mukabilinde beşer guruş ücret-i yevmiye ita olunacaktır.

Otuz birinci madde: Ehl-i hibreden olanların mahkemece malumatlarına müracaat olunduğu takdirde o iş içün vukubulacak masarıf hariç olduğu halde kendilerine ayrıca verilecek ücretin miktarını mahkeme tayin ve tahsis edecektir.

Otuz ikinci madde: Mahkemeye celb olunacak şahidlerin masarıf-ı vakıaları miktarını mahkeme tahsis edecek ve ücret-i yevmiyeleri her halde beş guruştan aşağı olmayacaktır.

Otuz üçüncü madde: Ehl-i hibre ve şahidlerin şehrin haricine sevk ve izamları lazım gelip de taraf-ı mahkemeden gönderildikleri halde itası muayyen olan ücretten maada otuz birinci ve otuz ikinci maddeler hükmünce azimet ve avdet masarıflarıçün saat başına beşer guruş verilecektir.

Otuz dördüncü madde: Ehl-i hibre veyahut mahkeme azasının hademeden biriyle hariç şehre memur ve izam olundukları ve şahidler dahi oraya celb edildikleri halde mahkemenin ba-ilâm tayin ve takdir edeceği mikdara göre masarıf-ı rahiyelerini müddei ve müddeaaleyh ale’t-tesavi tesviye edeceklerdir.

Otuz beşinci madde: Kazalar mehakim ve aklamının hasılat-ı rüsumiyesinden mah-be-mah hasıl olacak mebaliğ liva mal sandığına gönderilecek ve oradan dahi varidat-ı vilayet olmak üzere kayd tahtına alınacaktır.

Otuz altıncı madde: Mahkeme azasının ve müstantıkların veyahut şahid veyahut ehl-i hibreden birisinin namına alınacak rüsum sahipleri yedlerine teslim olunacaktır.

Beşinci Fasıl

( İstisna-yı rüsum hakkındadır )

Otuz yedinci madde: Devair-i resmiye-i hükümet ve aklamca resmen taati olunacak