107

( Fasl-ı Sâlis )

( Redd ve iâde-i me'cûre müteallik mevad beyanındadır )

591 Madde İcarenin inkızâsında müste'cirin me'cûr üzerinden ref'-i yed etmesi lâzımdır.

592 Madde İcarenin inkızâsından sonra müste'cir artık me'cûru istimâl edemez.

593 Madde İcare munkazî olub da âcir malı almak istedikde müste'cirin dahi teslim etmesi lâzımdır.

594 Madde Me'cûrun redd ve iâdesi müste'cirin üzerine lâzım olmayub icarenin inkızâsında me'cûrun ahzı âcir üzerinedir. Meselâ bir hanenin icâresi munkazî oldukda sahibi varub hanesini teslim etmek lâzımdır. Kezâlik falan mahalle kadar bir hayvan isticâr olundukda sâhibi ol mahallede bulunub hayvanını almak lâzım gelür ve gelüb almadığı halde müste'cirin taaddî ve taksîri olmaksızın yedinde ol hayvan telef olsa zâmin olmaz. Ammâ bir mahall-i muayyenden gidüb gelmek üzere isticâr etmiş olsa ol mahalle götürmesi lâzım gelür ve oraya götürmeyerek kendü hanesine götürüb tutsa ve hayvan telef olsa zâmin olur.

595 Madde Me'cûrun redd ve iâdesi haml ve meûnete muhtaç ise ücret-i nakliyesi âcir üzerinedir.

( Bâb-ı Sâmin )

( Zamânât beyanında olub üç faslı hâvidir )

( Fasl-ı Evvel )

( Zamân-ı menfaat hakkındadır )

596 Madde Bir kimse bir malı sâhibinin izni olmaksızın istimâl etmiş olsa gasp kabîlinden olarak menâfiini ödemek lâzım gelmez. Fakat mal-ı vakf ya mal-ı sagîr ise her halde ve muadd li'l-istiglâl ise te'vil