109

Ve sagîr fevt olsa veresesi dahi ol müddetin ecr-i mislini ol kimseden alabilirler.

( Fasl-ı Sânî )
( Müste’cirin zamânı hakkındadır )

600 Madde Akd-i icâre gerek sahîh olsun ve gerek sahîh olmasın müste’cir yedinde me’cûr emânetdir.
601 Madde Me’cûr eğer müste’cir yedinde telef olur ise müste’cirin taaddîsi yâ taksîri veyâhud me’zûniyetine muhâlefeti olmadıkça zamân lâzım gelmez.
602 Madde Müste’cirin taaddîsi ile me’cûr telef olsa yâhud kıymetine noksan gelse müste’cire zamân lâzım gelir.
Meselâ müste’cir kirâ hayvanı urup öldürse yâhud unf ve şiddet üzere sürmekle hayvan telef olsa kıymetini zâmin olur.
603 Madde Müste’cirin hilâf-ı mu’tâd hareketi taaddî olup bundan tevellüd eden zarar ve hasârı zâmin olur.
Meselâ istîcâr etdiği elbiseyi âdet-i nâsa muhâlif olarak isti’mâl edip de fersûde olsa zâmin olur.
Kezâlik hâne-i me’cûrda nâsın yakmadığı mertebe ziyâde ateş yakmasından nâşî harîk zuhûriyle hâne muhterik olsa zâmin olur.
604 Madde Müste’cirin emr-i muhâfazada taksîri ile me’cûr telef olsa yâhud kıymetine noksan gelse zamân lâzım gelir.
Meselâ müste’cir kirâ hayvanı başı boş bir mahalde salıvermekle zâyi’ olsa zâmin olur.
605 Madde Meşrûtun mâ-fevkine tecâvüz ile müste’cirin kendi me’zûniyetine muhâlefeti zamânı mûcib olur.
Ammâ misline yâhud mâ-dûnuna udûl ile muhâlefeti zamânı îcâb etmez.
Meselâ müste’cir şu kadar kıyye yağ yükletmek üzere istikrâ eylediği hayvana ol kadar kıyye temur yükletip de hayvan telef olsa zâmin olur.
Ammâ madarratda yağa müsâvî yâhud dahâ hafîf bir cins hamûle yükletip de hayvan telef olsa zamân lâzım gelmez.