112

( Ahkâm-ı Adliye’den Kitâb-ı Sâlis )

( Kefâlet hakkında olup bir mukaddime ile üç bâbı hâvîdir )

( Mukaddime )

( Kefâlete dâir olan ıstılâhât-ı fıkhiyye beyânındadır )

612 Madde Kefâlet bir şeyin mütâlebesi hakkında zimmeti zimmete zam itmekdir. Ya'ni bir kimse zâtını dîgerin zâtına zam idüp ve ânın hakkında lâzım gelen mütâlebeyi kendü dahi iltizâm eylemekdir.

613 Madde Kefâlet bi'n-nefs bir âdemin şahsına kefîl olmakdır.

614 Madde Kefâlet bi'l-mâl bir mâlın edâsına kefîl olmakdır.

615 Madde Kefâlet bi't-teslîm bir mâlın teslîmine kefîl olmakdır.

616 Madde Kefâlet bi'd-derek mebî' bi'l-istihkâk zabt olundığı takdîrde akçesini edâ ve teslîme yâhud bâyi'in nefsine kefîl olmakdır.

617 Madde Kefâlet-i münecceze şarta mu'allak ve zamân-ı müstakbele muzâf olmayan kefâletdir.

618 Madde Kefîl kendü zimmetini âharın zimmetine zam iden ya'ni âharın müte'ahhid oldığı şey'e kendü dahi müte'ahhid olan kimesnedir ki ol âhara asîl ve mekfûlün 'anh denilür.

619 Madde Mekfûlün leh kefâlet husûsunda tâlib ve dâyin olan kimesnedir.

620 Madde Mekfûlün bih kefîlin teslîmine yâ edâsına müte'ahhid oldığı şeydir ki kefâlet bi'n-nefsde mekfûlün 'anh ile mekfûlün bih bir şeydir.

( Bâb-ı Evvel )
( 'Akd-i kefâlet hakkında olup iki faslı hâvîdir )

( Fasl-ı Evvel )
( Rükn-i kefâlet hakkındadır )

621 Madde Yalnız kefîlin îcâbıyla kefâlet mün'akid ve nâfiz olur. Fakat mekfûlün leh dilerse red idebilür. Ve mekfûlün leh red itmedikçe kefâlet bâkî kalur.