122
( Ahkâm-ı Adliye'den Kitâb-ı Râbi' )

( Havale hakkında olup bir mukaddime ile )
( İki babı hâvîdir )
( Mukaddime )
( Havaleye dâir olan ıstılâhât-ı fıkhiyye beyânındadır )

673 Madde Havale, deyni bir zimmetten diğer zimmete nakl etmektir.
674 Madde Muhîl, havale eden kimse ki medyûndur.
675 Madde Muhâlün leh, dâin olan kimsedir.
676 Madde Muhâlün aleyh, kendü üzerine havaleyi kabul eden kimsedir.
677 Madde Muhâlün bih, havale olunan maldır.
678 Madde Havale-i mukayyede, muhîlin muhâlün aleyh zimmetinde yâhud yedinde olan malından vermek üzere deyu mukayyed olan havaledir.
679 Madde Havale-i mutlaka, muhîlin muhâlün aleyhde olan malından vermek üzere deyu mukayyed olmayan havaledir.

( Bâb-ı Evvel )

( Akd-i havale beyânında olup iki fasla )
( münkasimdir )
( Fasl-ı Evvel )
( Rükn-ü havale beyânındadır )

680 Madde Muhîl kendü dâinine seni filânın üzerine havale ettim deyip anlar dahi kabul ettiklerinde havale mün'akid olur.
681 Madde Yalnız muhâlün leh ile muhâlün aleyh beyninde akd-i havale olunabilir. Meselâ bir kimse birine benim filânda olan şukadar guruş alacağımı havâleten sen üzerike al deyip o dahi kabul ettim dese yâhud filânda olan şukadar guruş alacağımı benim üzerime havâleten kabul et deyip o dahi etse havale sahih olur hattâ muhâlün aleyh sonra nâdim olsa nedâmeti fâide vermez.
682 Madde Yalnız muhîl ile muhâlün leh beyninde icrâ olunan havale muhâlün aleyhe lede'l-i'lâm kabul ettikde sahih ve tamâm olur.

Meselâ