125

Batıl olur ve borç muhîle avdet eder. Ve eğer mazmûn ise havâle bâtıl olmaz. Meselâ biri bir kimsenin yedindeki emânet akçesinden vermek üzere dâinini ol kimsenin üzerine havâle ettikten kable'l-ahz ol akçe bilâ-taaddî telef olsa havâle bâtıl olur ve dâinin alacağı muhîle avdet eder. Ammâ ol akçe mal-ı mağsûb olsa yâhud emânet olub da ol kimsenin itlâfıyla ödemesi lâzım gelse havâle bâtıl olmaz.

696 Mâdde: Bir kimse kendisinin bir muayyen malını satıp da semeninden edâ etmek üzere dâinini birinin üzerine havâle ve o dahi ol şartla havâleyi kabûl etse sahîh olur ve muhal-ün aleyh ol malı satıp da semeninden deyni edâ etmek üzere icbâr olunur.

697 Mâdde: Havâle-i mübhemede ya'ni muhal-ün bihin ta'cîl ve te'cîli beyân olunmayan havâlede deyn eğer muhîl üzerine muaccel ise havâle muaccele olup muhal-ün aleyhin anı heman te'diyesi lâzım gelir. Ve eğer deyn müeccel ise havâle müeccele olup vâdesi hulûlünde edâsı lâzım olur.

698 Mâdde: Muhal-ün aleyh deyni edâ etmeden muhîle rücû' edemez. Ve rücû' edecek oldukda muhal-ün bih ile rücû' eder. Ya'ni ne cins akçe havâle olunmuş ise muhîlden anı alır. Yoksa müeddâ ile rücû' edemez. Meselâ gümüş akçe havâle olunup da altın verse muhîlden gümüş akçe alıp altın mutâlebe edemez. Kezâlik başka emvâl ve eşyâ ile te'diye etse havâle olunan akçeyi alır.

699 Mâdde: Muhal-ün bihin edâsıyla yâ diğer birinin üzerine havâlesiyle yâhud muhal-ün lehin muhal-ün aleyhi ibrâsıyla muhal-ün aleyh deynden berî olduğu gibi muhal-ün leh muhal-ün bihi hibe yâhud tasadduk edip de muhal-ün aleyh dahi kabûl etse kezâlik deynden berî olur.

700 Mâdde: Muhal-ün leh fevt olup da muhal-ün aleyh ona vâris olsa havâlenin hükmü kalmaz.