128

Meselâ bir kimse bin guruş deyni mukabilinde iki bin guruşluk bir saat rehn ettikden sonra yine ol rehne mukabil olmak üzere dâininden beş yüz guruş daha alsa ol saat bin beş yüz guruşa rehn olmuş olur.

715 Madde Merhundan mütevellid ziyade asıl merhun ile beraber merhun olur.

( Bâb-ı Sâni )
( Râhin ve mürtehine müteallik ba’zı mesâil beyanındadır )

716 Madde Mürtehin hod-be-hod akd-i rehni feshedebilir.

717 Madde Mürtehinin rızası olmadıkça râhin akd-i rehni feshedemez.

718 Madde Râhin ve mürtehin bi’l-ittifak akd-i rehni feshedebilirler fakat ba’de’l-fesh mürtehinin ol rehn mukabilindeki alacağını râhindan istifâ edinceye değin rehni habs ve imsâke salâhiyeti vardır.

719 Madde Makfulün anhın kefile rehn vermesi câizdir.

720 Madde Bir medyunun iki dâini gerek birbiriyle şerîk olsun ve gerek olmasın kendisinden bir rehn alsalar câiz olur ve bu rehn iki deynin mecmu’u mukabilinde merhun olur.

721 Madde Biri iki kimsede olan alacağı içün bir rehn alsa câiz olur bu dahi iki alacağın mecmu’una merhun olur.

( Bâb-ı Sâlis )
( Merhune müteallik mesâil beyanında olup iki fasla münkasimdir )

( Fasl-ı Evvel )
( Merhunun meûnet ve masârifi beyanındadır )

722 Madde Rehni mürtehin bizzat hıfz eder yâhud ıyâli yâ şerîki ve yâhud hizmetçisi gibi emîni olan kimseye hıfz ettirir.

723 Madde Yer kirası ve bekçi ücreti gibi rehnin muhafazası içün olan masraf mürtehine âiddir.

724 Madde Rehn hayvan ise alefi ve çoban ücreti ve akar ise ta’mîri ve sakyi ve telkîhi ve otlarının ayıklanması ve harkının tathîri gibi bekâsı ve ıslâh-ı menâfi’i içün olan masraf râhine âiddir.

725