130

732 Madde
Rehn-i müstearı tahlis ile kendisine teslim etmek üzere sahibinin rahin müsteiri muahezeye salahiyeti vardır. Ve müsteir fakrı sebebiyle eda-yı deynden aciz olduğu surette muir ol deyni kendi tarafından eda ile malını rehnden tahlis edebilir.

733 Madde
Rahin ve mürtehinin vefatıyla rehn batıl olmaz.

734 Madde
Rahin fevt oldukda veresesi kibar ise anın makamına kaim olup terekeden te’diye-i deyn ile rehni tahlis etmeleri lazım olur. Ve eğer verese sıgar ise yahud kibar olub da gaib yani müddet-i sefer-i baîd olan yerde ise vasisi mürtehinin izniyle rehni satıp semeninden te’diye-i deyn eyler.

735 Madde
Rahin müsteir gerek ber-hayat bulunsun ve gerek fekk-i rehnden mukaddem fevt olsun rehn-i müstearın mukabili olan borç eda olunmadıkça muir olan kimse malını mürtehinden alamaz.

736 Madde
Rahin müsteir olan kimse müflis-i medyun olduğu halde fevt olsa rehn-i müstear mürtehin yedinde alel-hal merhun kalır. Fakat muirin rızası olmadıkça satılmaz. Ve muir rehni bey’ ile te’diye-i deyn edecek oldukda semeni deyne vefa ederse mürtehinin rızasına bakılmaksızın satılır. Ve eğer rehnin semeni deyne vefa etmez ise mürtehinin rızası olmadıkça satılamaz.

737 Madde
Muir eğer deyni terekesinden ezyed olduğu halde fevt olsa rahine bin-nefs deyni te’diye ile rehn-i müstearı tahlis ve redd etmek üzere emr olunur. Ve eğer fakrı sebebiyle te’diye-i deynden aciz olursa ol rehn-i müstear alel-hal mürtehin indinde merhun kalır. Fakat verese-i muir borcu eda ile anı tahlis edebilirler. Ve muirin dâinleri rehnin bey’ini mutalebe ettiklerinde semeni deyne vefa eder ise mürtehinin rızasına bakılmaksızın satılır. Ve eğer vefa etmez ise mürtehinin rızası olmadıkça satılamaz.

738 Madde
Mürtehin fevt oldukda rehn anın veresesi indinde merhun olarak kalır.

739 Madde
İki kimseye olan deyni içün bir rehn vermiş olan rahin birine...