138

Meselâ müstavdaın hânesinde hıfz olunmak şartıyla bir mâl îdâ‘ olunmuş iken harîk vukûuyla dîger mahalle nakline mecbûriyet geldikde ol şarta i‘tibâr olunmaz. Ve bu sûretde vedîa dîger mahalle nakl olunup da bilâ-ta‘addî ve lâ-taksîr telef yâ zâyi‘ olsa zamân lâzım gelmez.

Ve kezâ mûdi‘ müstavdaa vedîanın hıfzını emr edip de zevcesine yâ oğluna yâhud hizmetkârına ve yâhud kendü mâlını hıfz edegelen bir kimesneye virmekden nehy etdikde eğer ol kimesneye virmekde mecbûriyet var ise nehy mu‘teber olmaz. Bu sûretde müstavda‘ vedîayı ol kimesneye virip de bilâ-ta‘addî ve lâ-taksîr telef yâ zâyi‘ olsa zamân lâzım gelmez. Ve eğer mecbûriyet yok iken virse zâmin olur.

Kezâlik hânenin fülân odasında hıfz olunmak şart olunmuş iken müstavda‘ anı ol hânenin dîger odasında hıfz etdigi sûretde eğer ol odalar emr-i muhâfazada müsâvî iseler ol şarta i‘tibâr olunmaz. Ve bu hâlde vedîa telef olsa kezâlik zamân lâzım gelmez. Ammâ odaların biri kârgîr ve dîgeri ahşâb olmak gibi beynlerinde tefâvüt bulunsa şart mu‘teber olup müstavda‘ anı meşrût olan odada hıfz etmeğe mecbûr olur. Ve hıfzda ol odanın mâdûnu olan odaya koyup da telef olsa zâmin olur.

785 Mâdde — Vedîanın sâhibi gâib olup da hayât ve memâtı ma‘lûm olmasa müstavda‘ anı sâhibinin vefâtı tebeyyün edinceye dek hıfz eder. Fakat vedîa durmakla bozulacak şeylerden oldığı hâlde hâkimin izniyle satıp semenini nezdinde emânet olarak hıfz edebilir. Ammâ satmayıp da durmakla bozulsa zamân lâzım gelmez.

786 Mâdde — At ve eşek gibi nafakaya muhtâc olan vedîanın nafakası sâhibine âiddir. Sâhibi gâib oldukda müstavda‘ olan kimesne hâkime mürâcaat edip o dahi sâhib-i vedîa hakkında aslah ve enfa‘ olan sûretin icrâsını emr eyler.

* Şöyle *