139

Şöyle ki vedîanın îcârı mümkün ise müstevda‘ anı re’y-i hâkimle
îcâr edip ücretinden infâk eder yâhud semen-i misliyle satar ve îcârı mümkün
değilse kezâlik re’y-i hâkimle hemân yâhud üç güne kadar kendü mâlından
infâk ettikden sonra semen-i misliyle satıp nihâyet üç günlük masrafını
dahi sâhibinden ister
Ammâ hâkimin izni olmaksızın masraf eder ise mûdi‘den alamaz

787 Madde
Müstevda‘ın teaddî veyâ taksîri hâlinde vedîa telef veyâhud
kıymetine noksân târî olsa zamân lâzım gelir
Meselâ müstevda‘ kendüsünde vedîa olan nukûdu umûruna sarf ile
istihlâk etse zâmin olur
Bu sûretde nezdinde emânet olan bir kîse nukûdu o veçhile sarf
edip de ba‘dehu kendü mâlından yerine koyduktan sonra teaddî ve taksîri olmaksızın
zâyi‘ olsa zamândan kurtulamaz
Ve kezâ müstevda‘ yedinde olan hayvanı bilâ-izin binip de giderken
gerek fevka’l-âde sürmekle ve gerek dîger sebeble ve gerek bilâ-sebeb telef
olsa veyâhud esnâ-yı râhda sirkat olunsa müstevda‘ ol hayvanı
zâmin olur
Kezâlik harîk vukû‘unda müstevda‘ vedîayı dîger mahalle nakle muktedir iken nakl
etmeyip de muhterik olsa zamân lâzım gelir

788 Madde
Vedîayı sâhibinin izni olmaksızın dîger mâl ile
yek-diğerinden tefrîk olunamayacak sûretde karıştırmak teaddîdir
Binâen-aleyh müstevda‘ kendüsünde vedîa olan bir mikdâr yüzlük altınları
kendüsünün yüzlük altınları ile yâhud bir başkasının vedîa olan yüzlük
altınları ile bilâ-izin karıştırdıktan sonra zâyi‘ olsa yâhud sirkat olunsa
zâmin olur
Ve kezâ müstevda‘dan başka bir kimse mezkûr altınları o veçhile karıştırsa
ol kimse zâmin olur

789 Madde
Müstevda‘ eğer vedîayı sâhibinin izniyle madde-i ânifede
beyân olunduğu üzere dîger mâl ile karıştırsa yâhud kendüsünün sun‘u