143

809 Madde Muîr ve müsteîrin âkil ve mümeyyiz olmaları şartdır ......... bâliğ olmaları şart değildir.
Binâenaleyh mecnûn ile sabiyy-i gayr-i mümeyyizin iâre ve istiâreleri câiz olmaz.
Amma sabiyy-i me'zûnun iâre ve istiâresi câiz olur.

810 Madde Âriyetde kabz şart olub kabl'el-kabz hükmü yokdur.

811 Madde Müsteârın ta'yîni lâzımdır.
Meselâ ta'yîn ve tahyîr olunmaksızın iki bârgirden biri iâre olunsa sahîh olmayub muîr her hangisini iâre edecek ise ta'yîn etmesi lâzımdır.
Fakat her hangisini alır isen al deyu müsteîri tahyîr etse iâre sahîh olur.

( Fasl-ı Sânî )
( Âriyetin ahkâm ve damânâtı beyânındadır )

812 Madde Müsteîr bilâ-bedel âriyetin menfaatine mâlik olur.
Binâenaleyh muîr ba'de'l-isti'mâl müsteîrden ücret taleb edemez.

813 Madde Âriyet müsteîr yedinde emânetdir.
Bilâ-teaddî ve lâ-taksîr telef yâ zâyi' olsa yâhud kıymetine noksân gelse damân lâzım gelmez.
Meselâ âriyet âyine kazârâ müsteîrin elinden düşmekle yâhud ayağı kayıb da kendisi âyineye çarpmağla kırılsa damân lâzım gelmez.
Kezâlik âriyet keçe üzerine kazârâ bir şey dökülmekle lekelenib de kıymetine noksân gelse damân lâzım gelmez.

814 Madde Müsteîrin bir gûne teaddîsi yâ taksîri vâki' oldukda artık her ne sebeble olur ise olsun âriyet telef olsa yâhud kıymetine noksân gelse damân lâzım gelir.
Meselâ müsteîr iki günde varılacak mahalle âriyet hayvân ile bir günde gidib de ol hayvân telef olsa yâhud zebûn olarak kıymetine noksân gelse damân lâzım gelir.
Ve kezâ bir mahalle kadar istiâre etdiği hayvân ile ol mahalle varıb da dahâ ileriye tecâvüz etdikden sonra hatf-i enf hayvân telef olsa damân lâzım gelir.
Kezâlik bir kimse bir gerdanlık istiâre ile bir sabînin boynuna takıb ve yanında...