149

٨٤٣ ماده vahibin icabı delâleten kabza izindir ....... amma sarahaten izni mevhub eğer meclis-i hibede hazır ise bu malı sana hibe etdim al demek ve eğer gâib an-il meclis ise falan malı sana hibe etdim var al demek gibi emir sarihidir.

٨٤٤ ماده Vahib sarahaten kabza izin verdikde mevhubun lehin anı gerek meclis-i hibede ve gerek ba’d-el iftirak kabzı sahihdir. Amma delâleten kabza izni meclis-i hibe ile takayyüd edip ba’d-el iftirak kabzı muteber olmaz.
Meselâ şu malı sana hibe etdim deyip de mevhubun leh dahi anı ol meclisde kabz ediverse sahih olur amma meclis-i hibeden ayrıldıkdan sonra kabz etse sahih olmaz.
Kezalik falan mahalledeki malı sana hibe etdim deyip de var al dememiş olsa mevhubun lehin gidip de anı kabz etmesi sahih olmaz.

٨٤٥ ماده Müşteri mebî’i bayi’den kabl-el kabz âhara hibe edebilir.

٨٤٦ ماده Bir kimsenin yedinde bulunan malı sahibi ana hibe etdikde mevhubun lehin kabul etdim ya ittihab eyledim demesiyle hibe tamam olup müceddeden teslim ve kabza muhtaç değildir.

٨٤٧ ماده Bir kimse alacağını medyuna hibe yahud medyunı andan ibra edip o dahi red etmese sahih ve deyn heman sakıt olur.

٨٤٨ ماده Bir kimse birinin zimmetinde olan alacağını âhara hibe edip de var al deyu sarahaten kabza izin verse ve mevhubun leh dahi varıp kabz etse hibe tamam olur.

٨٤٩ ماده Kabl-el kabz vâhib yahud mevhubun leh fevt olsa hibe bâtıl olur.

٨٥٠ ماده Bir kimse kebir ya’ni âkil ve bâliğ olan oğluna bir şey hibe etdikde teslim ve kabz lâzımdır.

٨٥١ ماده Sagîrin vasîsi yahud mürebbîsi ya’ni hicr ve terbiyesinde bulunduğu kimse gerek yedinde bulunan ve gerek diğerin nezdinde vedîa olan malını ol sagîre hibe etdikde mücerred icab ile ya’ni yalnız hibe etdim demesiyle ol sagîr ana mâlik olup kabza muhtaç değildir.