152

Yahud ağaç gars etmek veyahud mevhub zebun hayvan olub da mevhubun leh yanında semizlenmek gibi ziyade-i muttasıla hasıl oldukda veyahud buğday olub da un edilmek gibi mevhubun ismi değişecek suretde tağayyür olundukda hibeden rücu sahih olmaz amma ziyade-i munfasıla mani-i rücu olmaz. Binaenaleyh bir kimsenin âhara hibe eylediği kısrak hamil oldukda hibeden rücu edemez amma doğurdukdan sonra rücu edebilir ve bu suretde yavrusu mevhubun lehe kalır.

870 Madde Mevhubun leh mevhubu bey' ile veyahud hibe ve teslim ile mülkünden ihraç eylese vahibin rücua salahiyeti kalmaz.

871 Madde Mevhubun leh yedinde mevhub müstehlek olsa rücua mahal kalmaz.

872 Madde Vahib ve mevhubun lehden birinin vefatı mani-i rücudur. Binaenaleyh mevhubun leh fevt olsa vahib hibeden rücu edemediği gibi vahib fevt oldukda dahi veresesi mevhubu istirdad edemez.

873 Madde Dâin alacağını medyuna hibe ettikde artık ondan rücu edemez. ( 51 ) ve ( 848 ) maddelere bak.

874 Madde Ba’de’l-kabz sadakadan bir vechile rücu olunamaz.

875 Madde Biri bir kimseye mat’umatdan bir şeyi ibaha ettikde ol kimesne gerçi ol şeyi alıp da âhara satmak veyahud hibe etmek gibi levazım-ı temellükden olan bir vechile tasarruf edemez. Fakat ol şeyden ekl ve tenavül edebilir ve ba’dehu sahibi anın kıymetini mutalebe edemez. Mesela bir bağ sahibinin izn ve ibahasiyle biri bağından bir miktar üzüm yese bağ sahibi sonradan ol üzümün akçesini alamaz.

876 Madde Hitan veyahud zifaf düğünlerinde gelen hediyeleri ashabı çocuk ya gelin ve babalarından her hangisine diye götürmüşler ise ol hediyeler anındır ve eğer kimin için getirdiklerini beyan etmeyip kendilerinden sual ile tahkik dahi kabil olmaz ise ol halde örf ve adet-i beldeye riayet olunur.

Fasıl