155

( Bâb-ı Evvel )
( Gasb hakkında olup üç faslı hâvîdir )

( Fasl-ı Evvel )
( Gasbın ahkâmı beyânındadır )

890 Madde Mâl-ı magsub aynen mevcûd ise mekân-ı gasbda sâhibine red ve teslimi lâzımdır ve sâhibi başka beldede gâsıba tesâdüf edip de mâl-ı magsub dahi yanında olduğu hâlde sâhibi dilerse malı orada istirdâd eyler ve eğer mekân-ı gasbda teslimini ister ise mü’net-i reddi ve masârif-i nakliyesi gâsıb üzerinedir.

891 Madde Mâl-ı magsubu gâsıb istihlâk ettikde zâmin olması lâzım geldiği gibi gerek ânın taaddîsiyle ve gerek bilâ-taaddî telef yâ zâyi olduğu takdîrde dahi zâmin olur.
Şöyle ki kıyemiyâtdan ise zaman ve mekân-ı gasbdaki kıymetini ve misliyâtdan ise mislini vermesi lâzım gelir.

892 Madde Gâsıb mekân-ı gasbda ayn-ı magsubu sâhibine red ve teslim ettikde zamândan berî olur.

893 Madde Gâsıb ayn-ı magsubu sâhibi ahz edebilecek bir sûretde önüne vaz’ ettikde hakîkaten kabz bulunmasa bile magsubu red etmiş olur ammâ telef olan magsubun kıymetini sâhibinin önüne vaz’ eylese hakîkaten kabz bulunmadıkça zamândan berî olmaz.

894 Madde Ayn-ı magsubu gâsıb bir mahal-i mahûfda sâhibine teslim etse kabul etmemeğe hakkı vardır ve gâsıb bu sûretde zamândan berî olmaz.

895 Madde Gâsıb telef olan mâl-ı magsubun kıymetini sâhibine getirip de kabul etmezse hâkime mürâcaat ile kabulünü emr ettirir.

896 Madde Magsubun minh sabî olduğu hâlde gâsıb aña magsubu red ettikde sabî mümeyyiz olup da malı hıfza ehil ise reddi sahîh olur değil ise sahîh olmaz.

897 Madde Magsubun meyve olup da gâsıb indinde kurumak gibi hâli tagayyür eyler ise sâhibi muhayyerdir dilerse magsubu aynen istirdâd eyler ve dilerse tazmîn ettirir.

898