157

Meselâ dağ yıkılmazdan mukaddem üst tarafındaki bahçenin kıymeti beş yüz ve alt
tarafındaki bahçenin kıymeti bin guruş olsa ikincisinin sahibi beş yüz
guruşu ilkinin sahibine i^tâ ile orasını zabt eyler
Nitekim bir kimsenin elindeki elli guruşluk incisi düşüp de diğerin beş
guruş kıymetli tavuğu anı yutsa inci sahibi beş guruş verip
tavuğu alır (27) ve (28) ve (29) maddelere bak

903 Madde Mağsubun zevâidi sahibinindir
Ve gâsıb anı istihlâk ederse dâmin olur
Meselâ mağsub olan hayvanın gâsıb yedinde hâsıl olan südü ve yavrusu
ve bir bahçenin yed-i gâsıbda iken husûle gelen meyvesi mağsubun minh malı
olmağla gâsıb bunları istihlâk eylerse dâmin olur
Kezâlik bir kimse birinin kovanı içindeki arısıyla beraber gasp etse sahibi
arısıyla beraber kovanını istirdâd ettikde gâsıb yanında iken hâsıl olan
balını dahi alır

904 Madde Bir bahçede mekân ittihâz eden arıların balı bahçe sahibinin
olup diğer kimesne ol balı ahz ve istihlâk eylese dâmin olur

( Fasl-ı Sâni )
( Gasp-ı akara müteallik ba^zı mesâil beyanındadır )

905 Madde Mağsub eğer akar kabîlinden ise gâsıb anı tağyîr ve tenkîs
etmeyerek sahibine red etmesi lâzımdır
Ve gâsıbın sun^ ve fi^li ile ol akarın kıymetine noksan gelse noksan-ı kıymetini
dâmin olur
Meselâ bir kimesne gasp eylediği bir hanenin bir yerini hedm edip yâhud seknâsı
sebebiyle harab olup da kıymetine noksan gelse mikdar-ı noksanı dâmin olur
Kezâlik gâsıbın hane-i mağsubda yakdığı ateşden hane muhterik olsa
mebniyen kıymetini dâmin olur

906 Madde Mağsub arz olup da gâsıb anın üzerine ebniye inşâ yâhud
eşcâr gars etse bunları kal^ ile arzı red etmek üzere gâsıba emr olunur
Ve eğer ebniye yâ eşcârın kal^i arza muzır ise mağsubun minh anların müstahakk
el-kal^ olarak kıymetlerini i^tâ ile anları dahi zabt edebilir