16

Mevadd-ı Umumiye

Bir kânun ve nizâmın yâ kâmilen değiştirilmesi veyâhud ba‘zı ahkâmının ta‘dîl ve tahvîli veyâ müceddeden bir kânun ve nizâm vaz‘ı iktizâ eyler ise kânun ve nizâm yapmakda müttehaz olan usûlün tamâmî-i icrâsıyla ya‘nî evvelâ Şûrâ-yı Devlet’de ve ba‘dehu Meclis-i Vükelâ-yı Fihâmda mütâlaasıyla kararlaştırılıb icrâsına emr ü fermân-ı hazret-i pâdişâhî müteallik buyurulmadıkça düstûrü’l-amel tutulamaz.

Yeniden vaz‘ olunan kavânîn ve nizâmâtın veyâhud tecdîd ve ıslâh olunan kavânîn ve nizâmât-ı kadîmede ta‘dîl ve tahvîl kılınan mevâddın ahkâmı tasrîh ve ta‘yîn olunan zamândan ve bir vakit ta‘yîn ve tasrîh olunmadığı hâlde Dersaâdet’de Takvîm-i Vekâyi‘e ve vilâyât ve elviyede mahallî resmî gazetelerine dercinden ve gazete bulunmayan yerlerde merkez-i vilâyet ve livâ olan şehir ve kasabalarda sâir vesâit-i münâsibe ile i‘lânı gününden i‘tibâren on beş gün mürûrunda neşr olunmuş addiyle düstûrü’l-amel olur.

Bir kânun yâ nizâmın hükmü mâ-kabline şâmil olamaz fakat muhaffif-i cezâ olan ahkâm-ı kânûniye bundan müstesnâdır.

İrâde-i Seniyye târîhi fî 25 Rebîü’l-âhir sene 1289

( Tâbiiyet-i Osmâniye Kânunnâmesidir )

Birinci Mâdde — Vâlideyni veyâhud yalnız vâlidi tâbiiyet-i Devlet-i Aliyye’de bulunduğu hâlde tevellüd eden eşhâs Devlet-i Aliyye tebeasından ma‘dûddur.

İkinci Mâdde — Vâlideyni ecnebî olduğu hâlde Memâlik-i Şâhâne’de mütevellid olan şahs sinn-i rüşde vusûlü târîhinden bed’ ile üç sene zarfında tâbiiyet-i
Devlet