189

... ol karye ve ol kasaba ahalisi kat‘ edip başka karye ve kasaba ahalisinin kat‘ etmeğe salahiyeti yoktur ve müteaddid karyelere kezalik min-el-kadim ihtitaben ve intifaen mahsus olan koru ve ormanların eşcarını dahi ol karye ahalisi kat‘ edip sair karyeler ahalisi kat‘ edemez ve bu makule koru ve ormanların resmi yoktur.

Toksan İkinci Madde
Ahali-i karyeye mahsus koru ve ormanlardan bir miktarı ifraz birle koru ittihaz olunmak veyahut ziraat içün açık üzere bir kimseye tefviz ile bi’t-tapu müstakillen veyahut müştereken tasarruf ettirilmez tasarruf eden olur ise cemi‘ zamanda ahalinin men‘ eylemeğe salahiyeti vardır.

Toksan Üçüncü Madde
Tarik-i âm üzerine bir kimse ebniye ihdas ya eşcar gars edemez edecek olur ise hedm ve kal‘ olunur ve’l-hasıl tarik-i âmda bir vechle kimse tasarruf edemez tasarruf eden olur ise men‘ olunur.

Toksan Dördüncü Madde
Bir karye ve kasaba dahilinde ya haricinde araba çekmek ve ya hayvanat birikmek kibi ahalinin intifaı içün terk olunmuş olan meydanlar ile namazgâh misillü mahaller tarik-i âm hükmünde olarak alınıp satılmaz ve üzerine ebniye ihdas ve eşcar gars olunmaz ve bir kimseye müstakillen tasarruf ettirilmez tasarruf eden olur ise ahali men‘ edebilir.

Toksan Beşinci Madde
Defterhane-i Âmire’de mukayyed olup min-el-kadim pazar ve panayır içün terk ve tahsis kılınmış olan yerler alınıp satılmaz ve bir kimseye müstakillen tasarruf eylemek üzere sened verilmez tasarruf eden olur ise men‘ olunur fakat bu makule mahaller içün mukayyed olan resm her ne ise canib-i hazineden ahz ve istifa kılınır.

Toksan Altıncı Madde
Bir karyenin umumen ahali-i müctemeasına min-el-kadim terk ve tahsis kılınan harman yeri alınıp satılmaz ve sökülüp ziraat ve hiraset olunmaz ve üzerine bir gûna ebniye ihdas ve inşasına ruhsat verilmez ve müstakillen ve ya müştereken tapu senediyle tasarruf kılınmaz tasarruf eden olur ise ahali men‘ eder ve bu makule harman yerine diğer karye ahalisi mezruatını nakl ederek dökemez.