200

( Tapu Nizamnamesi )

( Suret-i Hatt-ı Hümayun )
( Mucibince amel oluna )

Birinci Madde: Taşralarda arazî-i emiriyyenin tefvîz ve ihalesine mal memurları yani defterdar ve mal müdürleri ve kaza müdürleri me'zun olmalarıyla bunlar sahib-i arz hükmündedirler.

İkinci Madde: Arazî-i mezkûrenin ferağ ve intikal ve ihalatına dair hususlarda ziraat müdürlerinin müdahale-i mahsusaları olmayıp bu babda anlar yalnız meclis azalığı sıfatıyla aza-yı saire hükmünde bulunacaklardır.

Üçüncü Madde: Bir kimse arazisini ahara ferağ murad eyledikde fâriğin ol araziye sahihan mutasarrıf olduğunu ve kaç guruşa fâriğ olacak ise miktar-ı sahihini ve hangi kaza ve karye dahilinde bulunduğunu ve hudud ve sınırını ve miktar-ı dönümünü mübeyyin mahallesi veyahut karyesi imam ve muhtarları mühürleriyle memhur ilmühaber alınarak fâriğ ile mefruğun leh yahut vekil-i şer'îleri meclis-i memlekete geldiklerinde getirdikleri ilmühaberleri ahz ve hıfz ve harc-ı ferağı ahz ve istifa olunduktan sonra re's-i kazada ise müdir-i memleket ve re's-i liva ile kürsü-i eyalette ise oralarda bulunan mal memurları hazır oldukları halde takrirleri alınarak ba'de muamele-i kaydiyesi bil-icra derdest olan senedi alınıp hâmiş yazılmak veyahut atîk ise tebdil olunup eskisi battalda hıfz olunmak üzere re's-i kazada ise ba-mazbata harc-ı mezkûr ile beraber mülhak olduğu re's-i livaya gönderilip kaza mazbatası orada hıfz ve muamele-i kaydiyesi icra ile mucibince diğer mazbata tanzim ve defterhaneye takdim olunacaktır. Ve eğer re's-i livada ise heman mazbatası bi't-tanzim defterhaneye takdim kılınacaktır. Ve eğer fâriğin eski senedi yoğise ber-minval-i sabık tanzim olunan mazbatalarda keyfiyet-i tasarrufu beyan olunmak lazımdır (*)

Dördüncü Madde: Bir kimse taşrada bulunan arazisini Dersaadet'te ahara ferağ ...