216

( Tarifnâme )

( Mukaddeme )

Arâzi-i emîriyenin ahkâm-ı kânûniyesi bin ikiyüz yetmiş dört senesi
Zilhiccesi evâilinde ilân olunan Arâzi Kânunnâme-i Hümâyûnunda
ve bu kâra dâir me’mûrînin vezâif ve muâmelât-ı sâiresi dahi yetmiş beş senesi
Cemâziyelâhırasında tab’ ve temsîl ile her tarafa gönderilen Tapu Nizâmnâmesinde
meşrûh ve mufassal olarak bunların ahkâmı bundan böyle dahi mer’iyyü’l-icrâ
olacak olup ancak bu kere tapu senedâtının tanzîm ve itâsı husûsu
bir hüsn-i zâbıta ve nizâm altına konulmak üzere ittihâz olunan usûl-i cedîde
hasebiyle nizâmnâme-i mezkûrda muharrer olan muâmelâtın ikmâl ve teshîli lâzım
geldiği misillü yirmi birinci mâddesinde beyân olunduğu üzere arâzi
mutasarrıflarına verilmesi lâzım gelen tapu senedâtının Defterhâne-i Âmire’den
vürûduna kadar mu’teber olmak üzere meclis mührüyle memhûr olarak verilmesi
lâzım gelen muvakkat ilmühaberin yerine bu kere matbû’ ilmühaber cedvelleri tanzîm
olunmuş idüğünden şimdiye kadar mahallerinde harcı ve bedeli alınıp muvakkaten
verilmiş olan ilmühaberlerin işbu matbû’ ilmühaber cedvellerine tebdîli iktizâ
etmeyip Defterhâne’den tapu senedlerinin vürûduna değin sâhibleri yedlerinde
bırakılarak kemâ kân mu’teber tutulmak ve senedleri vürûdunda Defterhâne’ye gönderilmek
üzere bundan böyle zikr olunan matbû’ ilmühaber cedvelleri hakkında icrâsı
iktizâ eden muâmelâtın îzâhı zımnında işbu tarifnâme tanzîm kılınmıştır.

Birinci Bend: Zikr olunan defterler her sancak içün başka başka numaralı
mevzû’dur ve her defter iki yüz ilmühaber varakasını ve her ilmühaber varakası
dahi üç cedveli şâmildir ve her defterdeki ilmühaberler birinci numaradan
bed’ ile iki yüzüncü numaraya kadar sırasıyla defterlere dikilmiş
idüğünden lâzım olduğu vakitte vech-i âti’z-zikr üzere böyle sırasıyla
kullanılacaktır ve ne yolda kullanılacağı gereği gibi îzâh olunmak
içün suver-i mütenevviada matbû’ nümûne cedvellerinin bâlâlarına numaralar
vaz’