222

Gönderildiği târîhi dahi altındaki hâneye kayd olunacakdır. Mezkûr icmâl defterinin vukû'ât hânesine dahi intikâl ve ferâğ ve vukû'u gibi ve sâir dürlü ba'zı vukû'ât ve arâzînin bir hakkındaki merbûtiyyeti gibi ba'zı keyfiyyât yazılacakdır.

On üçüncü bend: Gerek mülhak kazâlardan gelen ilmühaber cedvelleri ve gerek re's-i livâ i'tibâr olunan kazâda sarf olunan ilmühaber cedvelleri ber-minvâl-i meşrûh icmâl defterine kayd olundukdan sonra onuncu numerolu livâ mazbatası nümûne senedi gösterildiği üzere bir livâ mazbatası tanzîm olunarak mülhak kazâlardan gelen mezkûr mazbatalarıyle berâber re's-i livâda terâküm etmiş olan mezkûr ilmühaber cedvelleri dahi bir zarfa vaz' ile cümlesi ol mazbataya leff olunup mecmû'u içün yapılacak zarfın bâlâsına arâzî mazbatasıdır ve orta sene defter emânet-i behiyyesi tarafına deyu tahrîr olunup posta ile tevdî'an doğruca Defterhâne'ye gönderilecek ve zarfların alt taraflarına dahi hangi kazâ ve sancakdan olduğu işâret kılınacakdır.

On dördüncü bend: Defterhâne-i 'Âmire'den tanzîm ve irsâl olunan tapu senedlerinin sancak başına hîn-i vürûdunda bilâ-imhâl târîh-i vürûdları icmâl defterinde senedâtın geldiği târîhi hânesine kayd ile bi'z-zât idâre olunan kazâ senedâtı ashâbının yedlerinde ki ilmühaberleri alınarak kendilerine teslîm olunacak ve mülhak kazâların senedâtı dahi serî'an mahallerine gönderilüp mezkûr kazâlarda dahi kezâlik ashâbı yedlerinde ki ilmühaberleri alınarak senedleri kendilerine teslîm kılınacakdır ve bu vechle toplanılan ilmühaberler sancak başına gönderilüp orada toplanmış olan ilmühaberler ile berâber takımıyla Defterhâne-i 'Âmire'ye gönderilecekdir.

Fî 15 Şa'bân sene 1276

Sûret