230

(Memalik-i Devlet-i Aliyye’de tevsi-i servet ve ma'muriyete medar olmak ve teba'a-i ecnebiyenin emlake mutasarrıf olmaları maddesinden dolayı hasıl olan müşkilat ve su'-i isti'malat ve her dürlü şübehat bertaraf olarak bu madde-i mu'tade-i behiyyenin dahi bir hüsn-i zabıta ve nizam altına alınmasıyla emniyet-i maliye ve mülkiye kaziye-i mültezemesi ikmal olunmak üzere bu def'a bi’l-irade-i seniye karar-gir olan mevadd-ı kanuniyedir ki ber-vech-i âti zikr olunur)

Birinci Madde
Düvel-i ecnebiye teba'ası Memalik-i Şahane’nin Arazi-i Hicaziye’den ma'ada her tarafında teba'a-i Devlet-i Aliyye misillü ve başka bir şart altında olmayarak mevadd-ı âtiyede mezkûr olduğu vechle anların bu hususda tabi' oldukları nizamat ve vezaife ittiba' kaydıyla dahil ve haric-i müdün ve kasabatda tasarruf-ı emlak hukukundan istifade etmeğe kabul olunmuşlardır. Fi’l-asl teba'a-i Hazret-i Şahane’den olup da sonradan tebdil-i tabiiyet etmiş olanlar bu kaideden müstesna olup anlar haklarında kanun-ı mahsusunun ahkamı cari olacaktır.

İkinci Madde
Birinci madde ahkamı iktizasınca dahil ve haric-i şuhurda emlake mutasarrıf olan ecnebiler emlaklerine aid kâffe-i hususatda teba'a-i Devlet-i Aliyye’nin mükellef oldukları şeraiti ifaya mecbur olacaklar ve bu mecburiyetin netice-i meşru'ası olmak üzere evvelâ emlakin tasarruf ve intikal ve ferağ ve istiglali hakkında halâ cari olan ve istikbalen cereyan edecek olan kavanin ve nizamat-ı zabıta ve belediyeye ittiba' edecek, saniyen her ne nam ve şekilde olur ise olsun dahil ve haric-i şuhurda teba'a-i Devlet-i Aliyye’den olan ashab-ı emlakin mükellef olduğu ve bundan böyle olabileceği kâffe-i tekâlif ve rüsumatı ifa eyleyecek, salisen emlake müteallik kâffe-i hususatda vaka'a dair bir da'va vukuunda gerek kendileri müdde'i ve gerek müdde'i aleyh olsun ve gerek iki taraf dahi teba'a-i ecnebiyeden bulunsun doğrudan doğruya Devlet-i Aliyye mahkemelerine