238

( Deyn içün emval-i gayr-i menkulenin )
( Furuhtı hakkında nizamnamedir )

Birinci madde: Bi'l-icareteyn tasarruf olunan müsakkafât ve müstegallât-ı mevkûfe ile arazi-i emiriye mahkûmun bih olan deyn içün medyunun rızasına bakılmayarak emlâk-i sırfa gibi satılır fakat medyunun haline münasip bir hanesi deyni içün satılmayıp terk olunur. Medyun erbab-ı ziraatten olduğu halde hanesi idaresine kâfi mikdar arazisi rehin olunmamış ve vekâlet-i devriye gibi bir kayd altına girmemiş ise kezalik satılmayıp terk edilir ve bu vechile terk olunacak arazinin mikdarı davanın rüyet olunduğu mahkeme marifetile tayin edilir.

İkinci madde: Medyun gayr-i menkulatının üç senelik hasılat-ı safiyesinin nizamen iktiza eden güzeşte ve masarifiyle beraber deyni ifaya kâfi olduğunu ispat eder ve istihsalini daine havale eyler ise gayr-i menkulatının furuhtundan sarf-ı nazar kılınır.

Üçüncü madde: Mahkûmun bih olan matlubu havale tarikiyle kabul eden şahs keyfiyeti medyuna tebliğ eyledikten sonra asıl dain gibi medyunun emval-i gayr-i menkulesinin furuht olunmasını iddia edebilir.

Dördüncü madde: Medyunun emval-i gayr-i menkulesi kabil-i istinaf olan hükümler üzerine furuht olunmayacağı gibi gıyaben olan hükümlerde dahi itiraz müddeti mürur etmedikçe satılamaz.

Beşinci madde: Dain alacağının ifasını ve ifa etmediği halde gayr-i menkulatının zabt ve furuhtı istidasına kıyam edeceğini mübeyyin bir ihbarname tanzim ve hükm ilamının bir suretini rabt ederek hükümet-i icraiye marifetile medyunun kendisine veya ikametgâhına gönderecektir.

Altıncı madde: Dain ihbarnameyi gönderdiği tarihden itibaren otuz bir gün geçmedikçe gayr-i menkulatın furuhtı davasına kalkışmayarak tarih-i tebliğinden itibaren aradan doksan bir gün geçmiş olur ise tekrar bir ihbarname gönderilecek ve bunun üzerine yine otuz bir gün geçmek lazım gelecektir.

Yedinci