257

Hademe hisseleri dahi gönderilecek defterde gösterilerek ilm ü haber cetvelinde hiç işâret olunmayacaktır.

Dokuzuncu Bend: Bâlâda muharrer muâmelât-ı tahrîriye kâmilen icrâ olunduktan sonra ilm ü haberlü cetvelin sağ tarafındaki ya‘nî bâlâsı Nezâret-i Evkâf-ı Hümâyûn’a deyu yazılı olan varaka nümûnelerinde gösterildiği mahalden kesilerek mutasarrıf olacak kimseye verilip ba‘dehû ilm ü haber varakasının ikinci cetveli dahi kesilerek eğer o mahallin atîk senedi var ise ana rabt ve yok ise ayrıca hıfz olunarak gayr ez mahlûlât bir ay zarfında ne kadar ilm ü haber cetvelleri terâküm eder ise dikili olan eski senedler ile berâber cümlesi zîri mazbatalı hâsılat defteri ile doğruca hazîneye gönderilecektir ve işbu gönderilecek hâsılat defterinin bir sûreti nümûne olarak gönderilmiş olduğundan işbu nümûnede gösterildiği vechle tanzîm olunacaktır ve mahlûlâtın ilm ü haberleri dahi müfredât defteriyle berâber her üç ayda bir kere gönderilecektir.

Onuncu Bend: Minvâl-i meşrûh üzere ilm ü haber varakalarının ikişer cetveli kat‘ olunarak üçüncü cetveli koçanında kalıp lede’l-îcâb muhâsebe görülmek ve mürâcaat olunmak üzere mahallerinde hıfz olunarak evkâf müdîrlerinin selefleri haleflerine tamâmen devr ve teslîm edeceklerdir eğer hîn-i devrde bir koçan eksik gelir ise kabûl olunmayarak Hazîne-i Celîle’ye bildirilecektir eğer hazîneye haber verilmeyerek kabûl olunur ise mes’ûliyet kabûl edene ric‘at edecektir nümûne varakalarını ve ta‘rîfnâmeyi ve ta‘lîmât lâyihasını ve defter sûretini dahi tamâmen teslîm edeceklerdir.

Fî 25 Ramazân sene 281 ve fî 9 Şubât sene 80

L
33