282

Fabrika ma’mulâtile eşyâ-yı ticâriyeye mahsus alâmet-i fârikalara dâir nizâmnâmedir

Fasl-ı Evvel

Alâmet-i fârika sâhiblerinin hukukuna dâirdir

Birinci Madde — Ma’mulât ve eşyânın i’mâl olunduğu mahallin veyâ fabrikanın veyâhud bunları i’mâl edenlerin veyâ ticâret zimnında satanların isim ve şöhret ve mevki’lerini bildirmek içün ol şeylerin üzerine vaz’ olunan isim ve mühür ve resim ve huruf ve erkam ve mahfaza ve sâire ya’ni temyîz ve tahsîs içün ittihâz kılınan her nev’ işâret ve tamga alâmet-i fârika add ve i’tibâr olunur.

İkinci Madde — Fabrika ma’mulâtına ve eşyâ-yı ticâriyeye mahsus alâmet-i fârika ittihâz ve isti’mâli taht-ı mecbûriyetde değildir fakat hîn-i hâcetde bunlardan ba’zıları içün alâmet-i fârika ittihâzı taraf-ı devletden sâdır olan emr üzerine mecbûrî olur.

Üçüncü Madde — Bir kimsenin intihâb etmiş olduğu alâmetin fasl-ı sânîde beyân olunduğu vechle iki kıt’a nüshasını ikâmet eylediği mahallin merkez-i livâ temyîz hukuk meclisine vaz’ ve teslîm eylemedikçe ol alâmetin münhasıran kendi malı olduğundan bahsle taklîd edenler aleyhine bir gûne da’vâ etmeğe salâhiyeti olamayacakdır.

Dördüncü Madde — Üçüncü maddede beyân olunduğu vechle resmen vaz’ ve teslîm olunan alâmetin hükmü on beş sene olup ancak her on beş senede bir kere nümûne sûretleri yeniden vaz’ ve teslîm olunduğu hâlde alâmete olan hakk-ı inhisâr teceddüd etmiş olacakdır.

Beşinci Madde — Sûretleri vaz’ ve teslîm olunan alâmet sâhiblerine verilecek ilmühaber içün bir aded Osmanlı yüzlük altını resm ahz olunup mahallî idâre-i belediyesi sandığına teslîm olunacakdır.

Altıncı Madde — Teba’a-i ecnebiyyeden olup memâlik-i devlet-i aliyyede sanâyi’ ve ticâret ashâbı