301

( Suret-i Hatt-ı Hümâyûn )
( Mucibince amel oluna )

( Bil-umum mehâkim-i şer'iyye hakkında müceddeden kaleme alınan nizamnamedir )

( Mukaddime )

( İşbu nizamname iki babı müştemildir. Bab-ı evvel mehâkim-i şer'iyyenin tahdîd-i )
( me'muriyetini mutazammın olup üç faslı şâmildir. Bab-ı sâni mehâkim-i şer'iyye )
( tarafından alınan harc ve ücurât-ı mu'tâdenin tahdîdini mübeyyin olup )
( bu dahi üç faslı müştemildir )
( Fasl-ı evvel mübâyeât ve müteferriâtı beyanındadır )

Birinci Madde: Nefs-i İstanbul'da vâkı' mülk akâr ve akâr kabilinden olmak üzere müteâref olan emlâk-i sâirenin mübâyeaları mutlakâ İstanbul mahkemesinde icra ve hüccet-i şer'iyyeleri mahkeme-i mezbûre tarafından i'tâ olunacaktır. Fakat İstanbul hükûmeti dairesinde bulunan Mahmud Paşa ve Ahı Çelebi ve Davud Paşa mahkemeleri nihayet elli bin kuruşa kadar mübâyea olunacak akâr ve sâirenin mübâyealarını icra ve hüccet i'tâsına me'zûn olup elli bin kuruşdan ziyâdeye satılan emlâkin mübâyeası gerek mehâkim-i mezkûre ve gerek mehâkim-i sâire taraflarından icra olunmayarak yalnız İstanbul mahkemesine mahsûs olacakdır.

İkinci Madde: Eyüb hükûmet-i şer'iyyesi dairesinde vâkı' akâr ve emlâk-i sâirenin mübâyeası yalnız hükûmet-i mezkûre tarafından ve Üsküdar hükûmet-i şer'iyyesi dairesinde bulunan akâr ve emlâk-i sâirenin mübâyeası dahi Anadolu sadâretine merbût olarak yalnız sadâret-i müşârün-ileyhâ ile Üsküdar mahkemesi cânibinden icra olunup yekdiğerinin hudûduna tecâvüz etmeyecekdir.

Üçüncü Madde: Galata ve tevâbi'i bulunan Kasım Paşa ve Tophane ve Beşiktaş ve Yeniköy hudûdları dâhilinde vâkı' bi'l-cümle mülk akâr ve sâirenin mübâyeaları Galata mahkemesi tarafından icra olunacaktır. Fakat kasabât-ı mezkûre mahkemeleri...