312

Yalnız kîsede beş guruş harc alınacakdır ve tecdîd-i idâne olundukda hâmiş hüccet harcı olmak üzere kîsede yüz para alınacakdır.

Elli yedinci madde — Haseb’en-nizâm üç senede bir kerre emvâl-i eytâm muhâsebesi rü’yet olunarak ba’d’el-ihrâc el-masârif fazlası kaldığı hâlde asıl mâla sirâyet itmemek üzere fazlanın kâfî oldığı mertebe mecmû’-ı mâldan harc-ı muhâsebe olarak kîsede beş guruş alınacakdır fakat haseb’el-îcâb bir sene mürûrunda muhâsebesi rü’yet olundığı sûretde zikr olunan harc-ı muhâsebenin sülüsü ve iki sene mürûrunda rü’yet olundığı takdîrce sülüsânı ve üç sene veyâhûd ziyâde mürûrunda rü’yet olunur ise sâlif’üz-zikr kîsede beş guruş alınacakdır ve eğer ba’d’el-ihrâc el-masârif fazla kalmaz ise harc-ı muhâsebe alınmayub bir vech-i hasbî rü’yet olunacakdır.

Elli sekizinci madde — Mefkûd ve ma’tûh ve mecnûn emvâli ma’rifet-i şer’le tahrîr olundukda tanzîm olunacak defter içün kîsede beş guruş harc alınacakdır.

Elli dokuzuncu madde — Emr-i tezvîci icrâ olunacak bâkir içün yalnız on guruş ve seyyib içün dahi yalnız beş guruş izinnâme harcı alınacakdır.

(Fasl-ı Sâlis)

(Mehâkim-i şer’iye taraflarından mesâlih-i mütenevvi’a zımnında irsâl olunan hademe)
( Şer’-i şerîf içün alınacak ücretlerin tahdîdi beyânında dır )

Altmışıncı madde — Mehâkim-i şer’iyeden mahalline istimâ’ ve fasl-ı da’vâ ve ikrâr ve vesâyet ve nasb-ı vekîl ve idâne ve istidâne ve mübâya’a ve ikrârlarının ve tatlîk ve muhâla’a ve tefrîk-i eşyâ ve taksîm-i akâr ve ibrâ ve musâlaha ve tahlîf ve bunlara mümâsil husûsât-ı sâire zımnında gönderilen kâtib ve ümenâ içün maslahatın tahammülüne göre elli guruşdan nihâyet üç yüz guruşa kadar harc-ı husûs alınacakdır.

Altmış birinci