327

Sekizinci Madde: Dîvân-ı Ahkâm-ı Adliye reîsi ve reîs vekilleri ve a'zâsı ve mümeyyizleri bâ-irâde-i seniye nasb ve ta'yîn buyurulur. A'zâ-yı meclis rütb-i dîvâniyeden her kangı rütbede bulunur ise bulunsunlar meclisçe hukûk-ı müsâviyeye nâil ve Şûrâ-yı Devlet a'zâsıyla müsâvidirler ve Dîvân-ı Ahkâm-ı Adliye a'zâsının istifâsı vukû' bulmadıkça veyâhûd bi'l-muhâkeme müttehem olduğuna hükm olunmadıkça azl olunmayacaktır.

Dokuzuncu Madde: Dîvân-ı Ahkâm-ı Adliye'nin murâfa'a ve hükümlerine icrâ me'mûrlarından hîç bir kimsenin dahl ve ta'arruzu olamayıp hükûmet-i icrâiye yalnız tefrîk-i da'âvî yolunda havâle-i mesâlih ile Dîvân hükm ve i'lâmlarını icrâya me'mûrdur (*)

Onuncu Madde: Dîvân-ı Ahkâm-ı Adliye'nin rü'yet ve faslına me'mûr olacağı da'âvînin envâ'ını ve mevâdd-ı hukûkîye ve cezâiye üzerine usûl-i muhâkemâtı ve hükm ve kararlarının sûret-i arzını mübeyyin iktizâ eden nizâmât Şûrâ-yı Devlet'de bi'l-müzâkere bâ-irâde-i seniye mevki'-i icrâya konulacaktır.

Dîvân-ı Ahkâm-ı Adliye'nin muhâkemâtı alenî olup fakat her ne vakit tensîb eder ise muhâkemâtın hafî olarak cereyânı hükm edebilir.

Fî 8 Zilhicce sene 1284

(*) Havâle ve İcrâ Cem'iyetleri nizâmnâmeleriyle ta'dîl olunmuşdur.