328

( Dîvân-ı Ahkâm-ı Adliye'nin Nizâmnâme-i Dâhilîsidir )
( Mukaddime )

Memâlik-i Devlet-i Aliyye'de mehâkim-i nizâmiye dört dereceye taksîm olunmuşdur birincisi kazâlarda bulunan da'vâ meclisleri ikincisi livâlarda bulunan temyîz-i hukûk meclisleri üçüncüsü merkez-i vilâyetlerde bulunan temyîz dîvânları dördüncüsü Dersaâdet'de bulunan Dîvân-ı Ahkâm-ı Adliye ki mehâkim-i nizâmiyenin a'zamıdır (*)

İşbu mehâkim-i nizâmiyeden birinci derecede bulunan da'vâ meclisleri bidâyeten rü'yet-i deâvîye me'mûrdur

Livâ vilâyet merkezlerinde bulunan temyîz-i hukûk meclisleri da'vâ meclislerinin bidâyeten gördükleri da'vâları istid'â üzerine istînâf etmeğe ve kendilerinin me'zûniyet-i nizâmiyeleri derecesinde bulunan da'vâları bidâyeten rü'yet etmeğe me'mûrdurlar

( Dîvân-ı Ahkâm-ı Adliye İki Mahkeme )
( Kânûniyeden mürekkebdir )

Birincisine mahkeme-i temyîz ıtlâk olunur bu mahkeme cinâyet ve hukûk-ı âdiye da'vâlarıyçün mehâkim-i nizâmiyeden verilen i'lâmların tedkîk ve lede'l-iktizâ nakzına me'mûrdur

Ve iki dâireye münkasim olub birisi muhâkemât-ı cezâiyenin ve dîgeri hukûk-ı âdiye da'vâlarının temyîzine mahsûsdur

Mahkeme-i sâniye Dersaâdet'de el-yevm mahkeme-i nizâmiye olub on sekizinci mâddede muharrer olduğu üzere gerek muhâkemât-ı cezâiye ve gerek hukûk-ı âdiyeye dâir en sonra rü'yet olunmuş olan da'vâların kat'iyyen tedkîk ve hükmüne me'mûrdur (5)

________________
(*) Mehâkim-i nizâmiye nizâmnâmesi hükmünce mehâkim-i nizâmiyenin derecâtına dâir olan ahkâm ta'dîl olunmuşdur
(5) Dersaâdet mehâkim-i nizâmiyesi nizâmnâmesi hükmünce ta'dîl olunmuşdur
* İdâresine *