354

ve takti-i hudud misillü kıymet üzerine cereyan etmeyen davaları kabil-i istinaf olarak rü'yet ederler. Bir kazanın deavi meclisinde kabil-i istinaf olarak rü'yet olunan bir davayı o kazanın tabi olduğu liva meclisi temyiziyle vilayet divan-ı temyizinden hangisinde ister ise istinaf ettirmekte müstenif muhayyer olup fakat bir kere liva meclisi temyizinde istinaf olunan davanın tekrar vilayet divan-ı temyizinde istinafı caiz değildir.

Yedinci Madde: Deavi meclislerinin birinde kat'iyyen hükm olunabilecek miktar üzerine bir dava görülür iken ana müteallik olarak müddeialeyh dahi müddeiden bir tazmin mutalebe eylediği halde işbu tazminin miktarı meclisin suret-i kat'iyyede hükmüne me'zun olduğu dereceden ziyade dahi olsa müddeinin asıl davasına taalluk cihetiyle suret-i kat'iyyede hükm olunur.

Sekizinci Madde: Kaza deavi meclisleri Ceza Kanunname-i Hümayunu'nun beşinci maddesinde muharrer olduğu üzere kabahat nevinden olan ceraime kat'iyyen ve kanunname-i mezburun dördüncü maddesinde muharrer olduğu üzere cünha kabilinden olan ceraime kabil-i istinaf olarak hükm ederler.

Dokuzuncu Madde: Deavi meclisleri cinayet davaları hakkında tahkikat-ı lazımeyi icra eyleyerek davayı Meclis-i Temyiz'e gönderirler.

Fasl-ı Sâlis
(Elviye Meclis-i Temyizlerinin Derece-i Me'muriyetlerine Dairdir)

Onuncu Madde: Her sancağın meclis-i temyizi ol sancağa mülhak bulunan kazalar deavi meclislerinde kabil-i istinaf olarak hükm olunan deavi-i hukukiyeyi istida üzerine istinafen rü'yet eder. Lakin merkez-i liva olan kazalarda deavi meclisi bulunmamak hasebiyle deavi meclisine aid davaları o makamda ve o salahiyette olarak fasl ve rü'yet eyler. Fakat merkez-i vilayet olan kazada tekevvün edip rü'yeti deavi meclisine aid olan deavi merkez-i vilayet deavi meclisinde rü'yet olunur.

On birinci