357

( Dersaadet hukuk-ı âdiye ve cezaiye mehâkim-i nizamiyesinin )
( Teşkilât ve vezaifine dair nizamnamedir )

( Bab-ı Evvel )
( Bidayet mahkemeleri beyanındadır )

Birinci Madde — Bidayet mahkemeleri iki nev' olup biri mevki' ve diğeri merkez bidayet mahkemeleridir. Mevki' bidayet mahkemeleri Dersaadet ve mülhakatının kaymakamlıklar makarlarında ve merkez bidayet mahkemeleri mutasarrıflık merkezlerinde bulunan bidayet mahkemeleridir.

( Nev'-i Evvel )
( Mevki' bidayet mahkemeleri beyanındadır )

İkinci Madde — Dersaadet'in havi olduğu kaymakamlıklar mevkilerinde bir daireden ibaret olarak birer mevki' bidayet mahkemesi vardır. Mevki' bidayet mahkemeleri bir reis ve ikişer a'zâdan ve birer mümeyyizden ve lüzumu kadar ketebe ve hademeden ibarettir.

Üçüncü Madde — Mevki' bidayet mahkemelerinde bir reis ile iki a'zâ mevcûd olmadıkça muhakeme icra olunamaz.

Dördüncü Madde — Reis hazır olmadığı halde a'zâdan en kıdemlisi vekâlet eyleyecek ve a'zâdan gelmeyen olur veyahud riyaset vekâletinde bulunur ise riyaset makamında olan zâtın emriyle mümeyyizler a'zâlık eyleyecekdir.

Beşinci Madde — Mehâkim-i şer'iyede rü'yeti lâzım gelen veyahud ahali-i gayr-i müslimenin idare-i ruhaniyeleri ma'rifetiyle rü'yeti mecaz veyahud mehâkim ve mecâlis-i mahsusalarında fasl ve hasm olunması mukarrer olan mevaddan mâadâ mevki' bidayet mahkemelerinin bin kuruş kıymet veyahud senevî yüz kuruş irad üzerine verdikleri hükümler ile yirmi dört saatden bir haftaya kadar habs cezası ve nihayet beş beyaz yirmilik mecidiye cezay-ı nakdîyi mûcib olan ef'ale dair verdikleri hükümler kâbil-i istinaf değildir.