359

Da'vâya mukâbil müddeî-aleyh tarafından dahi bu mikdardan aşağı bir da'vâ tahaddüs edüb de iki nev' da'vânın mebnî-aleyhi birleşdikde zikrolunan mikdarı tecâvüz etse bile yine verilen hüküm kâbil-i istînâf olamaz.

( Kısm-ı Sâni )

( Merkez bidâyet mehâkimi devâir-i cezâiyesinin vezâifi beyânındadır )

On üçüncü madde — Merkez bidâyet mahkemelerinin devâir-i cezâiyesinin vazîfesi bulundukları mahallerin dâhil-i dâiresinde kabahat ve cünhaya müteallik vukû bulan da'vâyı bidâyeten rü'yet etmek ve cinâyet derecesinde olan ef'âlin muhâkemesine girişmeyüb tahkîkâtını bi'l-icrâ dîvân-ı cinâyete gönderecekdir ve devâir-i cezâiyenin üç aya kadar habs ve beş aded yüzlük altununa kadar cezây-ı nakdîyi mutazammın verdikleri hükümler kâbil-i istînâf değildir.

( Bâb-ı Sâni )

( İstînâf mahkemeleri beyânındadır )

( Kısm-ı Evvel )

( Hukûk-ı âdiye istînâf mahkemesinin vazîfesiyle sûret-i )
( tertîbi beyânındadır )

On dördüncü madde — Dîvân-ı Ahkâm-ı Adliye Nezâreti dâiresinde hukûk-ı âdiye da'vâlarıçün bir mahkeme-i istînâf teşkîl kılınmışdır bu mahkemenin vazîfesi yalnız Dersaadet ve mülhakâtında bulunan mevkı' ve merkez bidâyet mahkemelerinin hukûk-ı âdiye da'vâsına dâir kâbil-i istînâf olarak verdikleri hükümleri istid'â üzerine istînâfen rü'yet etmekdir.

On beşinci madde — Mahkeme-i İstînâf bir reîs ile dört a'zâdan ve beş mümeyyizden ibâretdir maiyetinde lüzûmu kadar zabıt kâtibleri ve hademe bulunur.

On altıncı madde — Hukûk-ı âdiye bidâyet ve istînâf mahkemelerinin muhâkemât ve müzâkerâtı ve masâlihin sûret-i cereyânı Dîvân-ı Ahkâm-ı Adliye nizâmnâmesinde münderic usûl ve şerâite tevfîk edilir.