377

( Kanun-ı Ticaretin kısm-ı evveli alel-ıtlak ticaret ve kısm-ı sanisi dahi )
( ahval-i iflas beyanında olup alel-ıtlak muamele-i ticariyeye müştemil )
( olan kısm-ı evvel fusûl-i adideyi şamildir )

( Fasl-ı Evvel Tüccar Hakkındadır )

Birinci Madde Ticaretle meşgul olan ve ticarete dair be-senedat akd-i mukavele
eden şahıslara tüccar ıtlak olunur.
İkinci Madde Yirmi bir yaşını tekmil eden şahs usul-i ticarete sülûke
me'zun olup on sekiz yaşını tekmil edenler dahi veli veya vasisi tarafından
tekeffül ve ticarethane canibinden irae-i ruhsat olundukça ticarete sülûke
me'zun ola.

( Fasl-ı Sani her bir tacirin tutmağa mecbur )
( olduğu defter beyanındadır )

Üçüncü Madde Her bir tacir gün-be-gün ve madde-be-madde düyun ve zimem
ve matlubatını sebt ve kayd etmek içün Jurnal tabir olunan yevmiye defterini
tutmağa mecbur olup ticarete dair kaffe-i muamelatı ve mübayaa eylediği
poliçeyi veyahut kendine çekilüp kabul eylediğini ve zahriye vaz'ıyla
nakl-i havale ettiğini ve alel-ıtlak ahz ve itasını sebt ve masarifat-ı
beytiyesini dahi mah-be-mah bir kalem olarak defter-i mezkûra tahrir eyleye ve bundan
başka dahi bir defter tutup şerik ve adamlarına irsal eylediği mektupları
kayd ede ve şerik ve adamlarından tevarüd eden mektupları mah-be-mah bağlayıp
hıfz eyleye.

Dördüncü Madde Tacir olan kimse üçüncü maddede beyan olunan defterlerden
başka be-her sene Bilanço tabir olunur diğer bir defter dahi tutmağa mecbur olup
emval ve eşya-yı menkulesini ve düyun ve zimem ve matlubatını bu deftere yegân yegân
sebt ve tahrir eyleye.
Beşinci Madde Salifü'z-zikr iki defterde ahir lafz tahriri mümkün olacak
mertebe hali mahal terki ve yazı bozukluğu ve meyane-i sutûra kelime ilavesi
l
48