379

mahsus vaz’ u diyete ya‘ni şirket unvâniyle ticâret kasdından ibâretdir.

On İkinci Mâdde Şirket-i mezkûreye vaz‘ olunacak unvân ancak şerîklerden birinin ismine veyâhud ikisinin isimlerine nisbet olunmak lâzımdır.

On Üçüncü Mâdde Şirket-i merkûmede imzâya me’zûn olan şerîklerin imzâ eylediği senedâtın mutazammin olduğu cemî‘ teahhüdât ve mukâvelât içün şirketde dâhil bulunan bi’l-cümle şürekâ kefîl ve zâmindirler.

( Nev‘-i Sânî )

On Dördüncü Mâdde Komandit ya‘ni sipâriş tarîkiyle olan şirket şöyledir ki bir tarafdan birbirine mütekeffil ve mes’ûl olan bir ve müteaddid şerîkler ve dîger tarafdan yalnız sermâyelerini koyup komanditer ya‘ni sermâye sâhibi ve sipârişlü ortak ta‘bîr olunan bir ve müteaddid şerîklerden ibâret olan şirketdir ve bunun dahi müşterek bir tesmiyesi olup birbirini mütekeffil ve mes’ûl şerîklerden birinin veyâhud nicelerinin ismi olmak lâzımdır.

On Beşinci Mâdde Birbirini mütekeffil olmak üzere senedde isimleri mezkûr olan şerîkler müteaddid olup da cümlesi birden veyâhud cümlesi yerine bir ve müteaddid şerîkler umûr-ı şirketi idâre eyledikleri hâlde işbu şirket birbirini mütekeffil şerîklere nazaran umûmî isim ile ma‘kûd şirket makûlesinden ve yalnız sermâye ashâbı olanlara nazaran sipâriş şirketi ya‘ni komandit kabîlinden olur.

On Altıncı Mâdde Komanditer olan şerîkin ismi şirket unvânına dâhil olamaz.

On Yedinci Mâdde Komanditer olan şerîk yalnız şirket sermâyesine vaz‘ eylediği veyâhud vaz‘ eylemek üzere müteahhid olduğu meblağdan ziyâde zarar ve ziyânı mütehammil değildir.

On Sekizinci Mâdde Komanditer olan şerîk şirket umûrunda istihdâm olunmaz ve vekâleten istihdâmı dahi câ’iz olmaz.